លោក Rick Davidson អ្នកជំនាញនៅ​ពី​ក្រោយ​ភាព​ជោគ​ជ័យ​របស់ Century 21 មកដល់​កម្ពុជាលើក​ដំបូង

ហ៊ គីមសាយ 09/December/2019 14:37
ទស្សនា
ចែករំលែក

ភ្នំពេញ៖ លោក Rick Davidson ដែលជា​អ្នក​ជំ​នាញ​ដ៏​​​សំ​ខាន់មួយ​រូប​ក្នុង​ការ​ធ្វើ​ឲ្យ​​​ម៉ាក​យី​ហោ​ក្រុម​ហ៊ុន​ អចលន​ទ្រព្យ​ Century 21 Real Estate របស់​អាមេរិក​​​​​ល្បី​ល្បាញ​​លើ​ពិ​ភព​លោកបាន​បង្ហាញ​​វត្ត​មាន​ជា​លើក​ដំ​បូង​​​នៅ​កម្ពុជា​កាល​ពី​​​ថ្ងៃ​ទី ៨ ធ្នូ​ឆ្នាំ ២០១៩ ដើម្បី​​​​​​​​​​​ចែក​រំ​លែក​ចំ​ណេះ​ដឹង​ពី​ជំ​នាញ​​​​អចលន​ទ្រព្យ​​​បន្ទាប់​ពី​សង្កេត​ឃើញ​​សក្តានុ​ពល​ខ្ពស់ក្នុង​​ការ​អភិវឌ្ឍ​ន៍​វិ​ស័យនេះ​នៅ​កម្ពុជា​។

​លោក Rick Davidson បាន​ចំ​ណាយ​ពេលពេញ ៣ ទស្សវត្យ​ក្នុងអាជីពក្នុង​វិ​ស័យ​អចលន​ទ្រព្យ​ និង​​ការ​​អភិ​វឌ្ឍន៍​យី​ហោ​ក្រុម​ហ៊ុន Century 21។ ​ការ​មក​ដល់​កម្ពុជា​នា​ពេល​នេះ ​លោក​នឹង​ចែក​រំ​លែក​ចំ​ណេះ​ដឹង​លើ​​ប្រ​ធាន​បទស្តី​ពី​ «​គន្លឹះ​នៃភាព​ជោគ​ជ័យ​ក្នុង​ការ​កសាង​ម៉ាក​យី​ហោ​ Century 21 Everest»។

លោក Davidson កំ​ពុង​ធ្វើ​ការ​ចែក​រំ​លែក​ចំ​ណេះ​ដឹង​ពី​ជំ​នាញ​អចលន​ទព្យ​ដល់​ភ្នាក់​ងារ​អចលន​ទ្រព្យ​កម្ពុជា

លោក​​ស្រី ហ្គ្រែ​ស រចនី​ ហ្វង់ អគ្គនាយិការ​ក្រុម​ហ៊ុន​ Century 21 Cambodia ​បាន​ចាត់​ទុកព្រឹតិ្ត​ការ​​​ចែក​រំ​លែក​ចំ​ណេះ​ដឹង​​​នេះ​​គឺ​ជា​ឱ​កាស​​កម្រ​សម្រាប់​ អ្នក​មាន​អាជីព​ជា​ភ្នាក់​ងារ​អចលន​ទ្រព្យ​នៅ​កម្ពុជា​​ ហើយ​រំ​ពឹង​ថា​អ្ន​ក​ជំ​នាញ​នៅ​កម្ពុជា​នឹង​​​ទទួល​បាន​ចំណេះ​ដឹង​ថ្មីៗ​ដើម្បី​​អភិវឌ្ឍន៍​​​សមត្ថ​ភាព​របស់​ពួក​គេ និង​ដើម្បី​​ប្រើ​ប្រាស់​ជា​ទុន​​​​​​​សម្រាប់​កសាង​​ម៉ាក​យី​ហោ​ក្រុម​ហ៊ុនឲ្យ​កាន់​​តែ​ទទួល​បាន​ទំ​នុក​ចិត្ត​​ខ្លាំង​ពី​សាធារណៈ​ជន​​។ ​​​​

លោក​ស្រី​ថ្លែង​ថា​៖​«​ការ​ដែល​​​អ្នក​ជំ​នាញ​ដូច​ជា​លោក Rick Davidson​ អាច​នៅ​ជា​មួយ​ក្រុម​ហ៊ុន​មួយ​រហូត​​ដល់​ទៅ ៣០ ឆ្នាំ​គឺជា​​រឿ​ង​កម្រ​ និង​ជា​រឿង​ដ៏​គួរ​ឲ្យ​ចាប់​អារម្មណ៍​បំ​ផុត​។ ទាំង​នេះ​គឺ​ដោយ​សារ​ថា​ម៉ាក​យី​ហោ​ក្រុម​ហ៊ុន Century 21 Real Estate គឺ​ជា​ម៉ាកយី​ហោ​​ក្រុម​ហ៊ុន​អចលន​ទ្រព្យ​ដ៏​គួរ​ឲ្យ​ទុក​ចិត្ត និង​រឹង​មាំ និង​តែង​មាន​ការ​អភិវឌ្ឍន៍ជា​រៀង​ដរាប»​​។ លោក​ស្រី​បន្ត​ថា៖​«​ក្នុង​នាម​ជា​អ្នក​ជំ​នាញ​ជាន់​ខ្ពស់ លោក Davidson តែង​ចែក​រំ​លែក​ពេល​វេលា​ដ៏​ម​មា​ញឹក​របស់​លោកដើម្បី​ធ្វើ​បាឋកថា​​​ដល់​ភ្នាក់​ងារ​អចលន​ទ្រព្យ​នៅ​តាម​ប្រ​ទេស​ដែល​មាន​សេដ្ឋ​កិច្ច និង​វិ​ស័យ​អចលន​ទ្រព្យ​រីក​ចម្រើន​ខ្លាំង។ ដូច្នេះ វត្តមាន​របស់​លោក​នៅ​កម្ពុជា​នា​ពេល​នេះ​ឆ្លុះ​បញ្ជាំង​ពី​ការ​រីកចម្រើន​​នៃ​វិ​ស័យ​​អចលន​ទ្រព្យ​របស់​យើង​​ ហើយលោក​​​ប្រា​កដ​ជា​សម្លឹង​ឃើញ​ឱ​កាស​ ឬ សក្តា​នុ​ពល​ល្អណា​មួយ​ពី​​ការ​រីក​ចម្រើន​នៃ​វិ​ស័យ​អចលន​ទ្រព្យ​កម្ពុជា​​មិន​ខាន​»។

លោក​ គុយ វ៉ាត (កណ្តាល) ថត​រូប​អនុស្សាវរីយ៍​ជា​មួយ​លោក Davidson រួម​ជា​មួយ​អ្នក​ប្រឹក្សា​សំ​ខាន់​ៗ​

លោក​ Rick Davidson បាន​ចំ​ណាយ​ពេល​ជិត​ ១០ ឆ្នាំ​ក្នុង​តួនា​ទី​ជា​ នាយក​ប្រ​តិ​បត្តិ​ក្រុម​ហ៊ុន Century 21 Real Estate មាន​ការិយា​ល័យកណ្តាល​​នៅ​សហរដ្ឋ​អាមេរិក​ និង​​​ជា​ក្រុម​ហ៊ុន​មេ​គ្រប់​គ្រង​លើការិយា​ល័យ​ Century 21 ទូ​ទាំង​ពិ​ភព​លោក។ លោក Davidson ត្រូវ​បាន​ចាត់​បញ្ចូល​ក្នុង​បញ្ជី អ្នក​មាន​ឥទ្ធិ​ពល​ខ្លាំង​នៅ​ក្នុង​វិ​ស័យ​អចលន​ទ្រព្យ Inman’s Real Estate Influencers ​ របស់​សា​រ​ព័ត៌មាន​អចលន​ទ្រព្យ Inman​ នៅ​ចន្លោះ​ពី​ឆ្នាំ ២០១១ ដល់ ឆ្នាំ ២០១៧។

រហូត​ដល់​​ឆ្នាំ ២០១៧ លោក Davidson ត្រូវ​បាន​ផ្ទេរ​តួ​នា​ទី​ទៅជាប្រ​ធាន​ក្រុម​ហ៊ុន​ Everest Group ដែល​ជា​ក្រុម​ហ៊ុន​មេ​របស់​ Century 21 Everest-Troop Real Estate ដែល​មាន​ការិយា​ល័យ​ ១៧ នៅរដ្ឋ​ Utah និង រដ្ឋ California សហរដ្ឋ​អាមេរិក ហើយ​បាន​ធ្វើ​ឲ្យ​ Century 21 Everest ក្លាយ​ជា​ក្រុម​ហ៊ុន​អចលន​ទ្រព្យ​លេខ​១​លើ​ពិ​ភព​លោកនៅ​ឆ្នាំ ២០១៩ នេះ។

សម្រាប់​​​ទី​ផ្សារ​ប្រ​ទេសកម្ពុជា​វិញ ​គិត​មក​ទល់​ពេល​នេះ ការិយាល័យ​ Century 21 នៅ​កម្ពុជា​មាន​ ២៣ ការិយា​ល័យ​ (ភ្នំពេញ​ ២២ និង ព្រះ​សីហ​នុ​ ១) ហើយ​​ស្របពេល​​​វិ​ស័យ​អចលន​ទ្រព្យ​កម្ពុជា​បន្ត​រីក​ចម្រើន​ខ្លាំង លោក ស្រី រចនី ហ្វង់ បាន​បញ្ជាក់​​ថា នៅមាន​​ឱ​កាស​ជា​ច្រើន​ទៀត​សម្រាប់​ភ្នាក់​ងារ​អចលន​ទ្រព្យ​ក្នុង​ការ​ពង្រីក​អាជីវ​កម្ម​របស់​ពួក​គេ ហើយ​ការ​ជ្រើស​រើស​ក្រុម​​ហ៊ុន​ដែល​មាន​ម៉ាក​យី​ហោ​ល្បី​ល្បាញ និង​មាន​បណ្តាញ​ជុំ​វិញ​ពិ​ភព​លោកដូច​ជា Century 21 នឹង​ជួយ​ឲ្យ​អាជីវ​កម្ម​កាន់​តែ​ប្រ​សើរ​ឡើង។

លោក​ស្រី​បន្ត​ថា​៖​«​យើង​នឹង​ពង្រីក​ការិយា​ល័យ​ Century 21 ឲ្យ​បាន​ ៣៨ ការិយា​ល័យ​នៅតាម​ រាជធា​នី និង​ខេត្ត​ទាំង ២៥ នៅ​​កម្ពុជា​នៅ​ឆ្នាំ ២០២០ ខាង​មុខ​នេះ ហើយ​យើង​បាន​ត្រៀម​ខ្លួន​រួច​ជា​ស្រេច​ក្នុង​ការ​ផ្តល់​យោបល់​ល្អ​ៗ​ដល់​ការិយា​ល័យ​​ Franchise​ Century 21 ថ្មី ដោយ​ទទួល​បាន​កិច្ច​សហ​ការ​​​ផ្តល់​​​ប្រឹក្សា​យោបល់​ពី​ស្នាក់​ការ​ Century 21 ពី​សឹង្ហបុរី ជប៉ុន តៃវ៉ាន់ និង​ចិន​ជា​ដើម»​។

លោក​ស្រី​បន្ត​ថា ក្រុម​ហ៊ុន​ Century 21 Cambodia ដែល​មាន​លោក គុយ វ៉ាត ជា​ប្រ​ធាន​ក្រុម​ប្រឹក្សា​ភិបាល មាន​ទី​ប្រឹក្សា​ជំ​នាញ​ៗ​ជា​ច្រើន​សម្រាប់​ផ្តល់​យោ​បល់​ និង​យុទ្ធ​សា​ស្រ្ត​​សម្រាប់​ទី​ផ្សារ​អចលន​ទ្រព្យ​នៅ​ក្នុង​តំ​បន់​អាស៊ី​អា​គ្នេយ៍ និង ទី​ផ្សារ​ក្នុង​ប្រ​ទេស​អាស៊ី។ ក្នុង​នោះ​ លោក ជិន ភារុំ និង លោក Sambath Sprung គឺ​ជា​ទី​ប្រឹក្សា​សម្រាប់​ទី​ផ្សារ​កម្ពុជា លោក Philip Fong ជា​ទី​ប្រឹក្សា​ពី​ប្រទេស​សឹង្ហបុរីលោក Gino Chen សម្រាប់​ទី​ផ្សារ​តៃ​វ៉ាន់ និង​លោក Nagamatsu Hideyuki ជា​អ្នក​ជួយ​ផ្តល់​ប្រឹក្សា​សម្រាប់ទីផ្សារ​ប្រ​ទេស​ជប៉ុន។  

លោយ គុយ វ៉ាត (កណ្តាល) និង​លោក Davidson នឹង​ភរិយា

លោកទីប្រឹក្សាទាំង៥រូបបានលើកឡើងនៅក្នុងសេចក្តីថ្លែងរួមមួយថា៖«ជាសមទ្ធិផលមួយដែលយើងបានរួមចំណែក និងបានឃើញការរីកលូតលាស់របស់ក្រុមហ៊ុន Century 21 Cambodia រហូតបានក្លាយទៅជាក្រុមហ៊ុនអចលនទ្រព្យមួយដែលត្រូវបានទទួលស្គាល់ខ្លាំងជាងគេតំណាងកម្ពុជាសម្រាប់តំបន់អាស៊ី និង ប៉ាស៊ីហ្វិក»។

លោក Ken Lo ​នា​យក​ប្រតិ​បត្តិ​ក្រុមហ៊ុន Century 21 Imperial Realty Co., Ltd ដែល​ជា​​សមាជិកការិយាល័យ​មួយ​របស់​ Century 21 Cambodia បានបញ្ជាក់​ថា​ ម៉ាក​យី​ហោ​ក្រុម​ហ៊ុន Century 21 ពិត​ជា​បាន​រួម​ចំ​ណែក​បង្កើន​ទំ​នុក​ចិត្ត​ដល់​អតិ​ថិ​ជន ហើយ​បាន​ធ្វើ​ឲ្យ​អាជីវ​កម្ម​របស់​លោក​មាន​ការរីក​ចម្រើន​ជា​បន្ត​បន្ទាប់។

លោក​ថ្លែង​ថា​៖​«​វត្ត​មាន​របស់​អ្នក​ជំ​នាញ​ជាន់​ខ្ពស់​ដូច​ជា​លោក Davidson នៅ​ទី​ផ្សារ​របស់​យើង​នា​​ពេល​នេះ​គឺ​ជា​សារ​ដ៏​សំ​ខាន់​បញ្ជាក់​ថា​ទី​ផ្សារ​យើង​កំ​ពុង​មាន​ភាព​ល្អ​ឡើង សេដ្ឋ​កិច្ច​យើង​កំ​ពុង​មាន​ភាព​រឹង​មាំ ហើយ​វិ​ស័យ​អចលន​ទ្រព្យ​យើង​នឹង​នៅ​បន្ត​រីក​ចម្រើន​ថែម​ទៀត»៕

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង