អ្នកឯកទេសអន្តរជាតិ នឹងបង្វឹកជំនាញថ្មីដល់អ្នកប្រកបអាជីពក្នុងវិស័យអចលនទ្រព្យកម្ពុជា

លោកបណ្ឌិត Trevor Suter ដែលជាគ្រូបង្វឹកកម្រិតអន្តរជាតិមួយរូបឯកទេសខាងបណ្តុះបណ្តាលជំនាញ​ក្នុងបរិបទ​សេដ្ឋកិច្ចវិវត្តន៍ថ្មី នឹងផ្តល់វគ្គបណ្តុះបណ្តាលជំនាញភាពឆ្លាតវៃផ្នែកអារម្មណ៍ (Emotional Intelligence) ដល់អ្នកកំពុងប្រកបអាជីពក្នុងវិស័យអចលនទ្រព្យកម្ពុជា​ជិត ២០០ នាក់។

វគ្គបណ្តុះបណ្តាលនេះនឹងធ្វើឡើងរយៈពេលពីរថ្ងៃ​ចាប់ពីថ្ងៃអង្គារ៍ទី ១៦ កុម្ភះ ឆ្នាំ២០២១ ដល់ថ្ងៃពុធទី ១៧ កុម្ភះ ឆ្នាំ២០២១ នៅភោជនីយដ្ឋានទន្លេបាសាក់ 2 ដោយមានអ្នកចូលរួមសុទ្ធសឹងកំពុងប្រកបអាជីពក្នុងវិស័យអចលនទ្រព្យដូចជា ពីក្រុមហ៊ុនអចលនទ្រព្យ ERA ក្រុមហ៊ុន Century 21 Zillion Holding និង ក្រុមហ៊ុនអចលនទ្រព្យ Century 21 Cambodia។ វគ្គបណ្តុះបណ្តាលនេះធ្វើឡើង​ក្រោមប្រធានបទ «Emotional Intelligence»។

សកម្មភាពរបស់លោក Trevor Suter ក្នុងវគ្គបណ្តុះបណ្តាលមួយនាពេលកន្លងមក

លោកបណ្ឌិត Trevor Suter គឺជាអ្នកជំនាញផ្នែកបណ្តុះភាពជាអ្នកដឹកនាំសញ្ជាតិ​អង់គ្លេស ហើយលោក​បានចំណាយពេលជាង ៤០ ឆ្នាំក្នុងការងារបណ្តុះធនធានមនុស្ស និងអភិវឌ្ឍន៍​ស្ថាប័នកម្រិតអន្តរជាតិជាច្រើន។​ បច្ចុប្បន្ន លោកក៏កំពុងទទួលការងារជាគ្រូបង្វឹកប្រចាំ Century 21 Zillion Holding សម្រាប់គម្រោងបណ្តុះបណ្តាលអ្នកឯកទេសដីធ្លី 3 800 នាក់ ដែលកំពុងទទួលបានការគាំទ្រយ៉ាងខ្លាំងពីបងប្អូនអ្នកស្រលាញ់អាជីពក្នុងវិស័យអចលនទ្រព្យ។

មុនមកដល់កម្ពុជា លោក Trevor ធ្លាប់បំពេញការងារនៅតាមស្ថាប័នកំពូលៗជាច្រើននៅប្រទេសធំៗជុំវិញពិភពលោក​ក្នុងនាមជាគ្រូបង្វឹក និងអ្នកប្រឹក្សាយោបល់។ លោកធ្លាប់បម្រើការនៅ​កងអន្តរាគមន៍ពិសេស នៅបណ្តាប្រទេសធំៗជាច្រើន រួមមាន យោធាជើងទឹកអាមេរិក អង្គភាព​ប៉ូលីសទីក្រុងឡុង បម្រើការនៅគណៈកម្មាការអ៊ឺរ៉ុប និងបណ្តាក្រុមហ៊ុនធំៗកម្រិតអន្តរជាតិជាច្រើនទៀត ដូចជាក្រុមហ៊ុន IBM, Ford Motor Cars, Sony Electronics, Norwich Union Insurance, Canada Life, Sun Life of Canada, Blackstar (London) និងក្រុមហ៊ុនជាច្រើនទៀត។

នៅកម្ពុជាវិញ លោកបានចូលរួមបង្វឹក និងប្រឹក្សាយោបល់ដល់​ក្រុមហ៊ុនធំៗក្នុងវិស័យផលិតកម្មដូចជា ក្រុម​ហ៊ុន Coca Cola, Adidas, C&A, Comin Khmer, BAT, Nestle, Dumex។ ក្រុមហ៊ុនទូរគមនាគមន៍ដូចជា Cellcard, Smart Axiata និង​ក្រុមហ៊ុនហិរញ្ញវត្ថុដូចជា (Canadia Bank, Vattanac Bank, CIMB Bank, Maybank, RHB Indochina Bank, ANZ Royal Bank, Prudential, Forte Insurance, Manulife Insurance, Wing Amret Microfinance, Kredit MFI។ លោក Trevor Suter ក៏បានបំពេញការងារនៅស្ថាប័នក្រៅរដ្ឋាភិបាលជាច្រើនដូចជា អង្កការ Handicap International NGO, Vision Fund NGO, Transparency International NGO, Room-to-read NGO, Nexus NGO, UN, និង International Labour Organisation ជាដើម។

លោក​ Trevor Suter  បានបញ្ចប់ការសិក្សាថ្នាក់ បណ្ឌិតគ្រប់គ្រងធុរកិ​ច្ច ឯកទេសផ្នែកអភិវឌ្ឍន៍ភាពជាអ្នកដឹកនាំ ​សញ្ញាបត្រគ្រូបង្វឹកដែលមានការទទួលស្គាល់ពីស្ថាប័ន Marshall Goldsmith Stakeholder Centered​ Coach និងសញ្ញាបត្រឯកទេស ជំនាញសំខាន់ៗជាច្រើនទៀត។

លោកក៏ជា ស្ថាបនិក និងជានាយកក្រុមហ៊ុន Inspire Asia ដែលជាស្ថាប័ន បណ្តុះភាពជាអ្នកដឹកនាំ, និងជាគ្រូបង្វឹក​ភាពឆ្លាតវៃផ្នែកអារម្មណ៍ (Emotional Intelligence) និងជាគ្រូបង្វឹកឯកទេសខាង Agile Leadership ដែលកំពុងពេញនិយមក្នុងចំណោមស្ថាប័នធំៗ។

ការចែករំលែកចំណេះដឹង និងជំនាញរបស់លោក Trevor Suter នឹងរួមចំណែកកាន់តែប្រសើរដល់ការអភិវឌ្ឍន៍វិស័យអចលនទ្រព្យកម្ពុជា។