ទីតាំងដីនៅជាយក្រុងមួយនេះចាយទុនតិច តែលក់ចេញចំណេញខ្ពស់នាពេលអនាគត

ខេត្តកណ្តាល៖ តំបន់មុខកំពូលជាស្រុកមួយក្នុងខេត្តកណ្តាលត្រូវបានអ្នកឯកទេស​ខាងជំនួញដីធ្លីមើលឃើញថា ជាទីតាំងដែលមានសក្តានុពលជាងគេនៅជាប់ជាយរាជធានីភ្នំពេញ ក្នុងការវិនិយោគដីធ្លីដោយចាយទុនតិច តែទទួលផលចំណេញខ្ពស់នាពេលខាងមុខ។

លោក កាង​ សុធី នាយកប្រតិបត្តិក្រុមហ៊ុន  Century 21 Land Station បានឱ្យដឹងថា ទីតាំងដីនៅតំបន់មុខកំពូល​មានតម្លៃជាមធ្យម ២០ ដុល្លារក្នុងមួយម៉ែត្រការ៉េនាពេលបច្ចុប្បន្ន ដែលជាតម្លៃធូរថ្លៃជាងគេបើធៀបនឹងតំបន់ជាយរាជធានីភ្នំពេញផ្សេងៗទៀត។ លោកបន្ថែមថា តំបន់មុខកំពូលនឹងមានការវិវឌ្ឍយ៉ាងឆាប់រហ័ស ដោយសារវត្តមានគម្រោងធំៗកំពុងអភិវឌ្ឍនៅតំបន់ក្បែរនោះ។

លោក កាង​ សុធី នាយកប្រតិបត្តិក្រុមហ៊ុន  Century 21 Land Station

លោកថ្លែងថា៖ «តំបន់មុខកំពូលនៅជិតពហុកីឡដ្ឋានជាតិថ្មី មានបុរីធំៗកំពុងអភិវឌ្ឍន៍នៅតំបន់នេះ។ មុខព្រួញទាំងអស់បន្ទាប់ពីភាគខាងត្បូងតំបន់មហាវិថីសម្តេចហ៊ុន សែន​ គឺមានតំបន់មុខកំពូលហ្នឹងហើយ»។

លោកបញ្ជាក់បន្ថែមថា បន្ទាប់ព្រឹត្តិការណ៍កីឡាស៊ីហ្គេមលើកទី៣២ ដែលនឹងរៀបចំនៅពហុកីឡាដ្ឋានថ្មីនេះនៅឆ្នាំ ២០២៣ខា​ងមុខ នឹងអាចជំរុញឱ្យតំបន់មុខកំពូលនេះវិវឌ្ឍន៍ទៅជាទីក្រុងថ្មីមួយនាពេលអនាគត។

ទីក្រុងរណប Garden City របស់ក្រុមហ៊ុន LYP Group របស់អ្នកឧកញ៉ាលី យ៉ុងផាត់ ក៏កំពុងអភិវឌ្ឍន៍នៅក្បែរតំបន់ពហុកីឡាដ្ឋានផងដែរ។ បើតាមផែនការមេរបស់ក្រុមហ៊ុន LYP Group ទីក្រុងរណបនេះកំពុងអភិវឌ្ឍន៍លើផ្ទៃដីប្រមាណ១ពាន់ហិកតា ដែលបណ្តុំដោយតំបន់ពាណិជ្ជកម្ម លំនៅដ្ឋាន តំបន់កម្សាន្តនិងសម្រាកលម្ហែកាយ។ (សូមមើលផែនការមេរបស់ក្រុមហ៊ុន)

រូបភាព៖ LYP Group

បើគិតពីតំបន់​ព្រែកលៀប រហូតដល់​​ព្រែក​អញ្ចាញ (ស្រុកមុខកំពូលខេត្តកណ្តាល) តាមបណ្តោយ​ផ្លូវជាតិ​លេខ៦A បុរីធំៗជាច្រើនកំពុងមានវត្តមានរួចទៅហើយដែរដូចជា បុរី​អ័​រ​គី​ដេ បុរី​ប៉េង​ហួត បុរី ឌឹផ្លរ៉ា  និងបុរីវិមានភ្នំពេញជាដើម។​

តាមទិន្ន័យពីក្រុមហ៊ុន Century 21 Zillion Holding ប្រចាំសាខាខេត្តកណ្តាល បានបង្ហាញថា ទីតាំងដីធ្លីតាមបណ្តោផ្លូវជាតិលេខ 6A (ក្នុងទីតាំងភូមិសាស្រ្តខេត្តកណ្តាល) មានតម្លៃចន្លោះពី ២៥០ ដុល្លារ ទៅ​៦០០​ ដុល្លារក្នុងមួយម៉ែត្រការ៉េ។