ម្ចាស់សហគ្រិនជានិស្សិតឈ្នះពានប្រចាំកម្ពុជា បន្តចូលរួមប្រកួតប្រជែងកម្រិតពិភពលោក

ប៊ុនធឿន 08/January/2021 17:07
ទស្សនា
ចែករំលែក

ភ្នំពេញ៖ Entrepreneurs’ ​Organization (EO) Cambodia ដែលជាអង្គការសហគ្រិន​​​អន្តរ​ជាតិប្រចាំកម្ពុជា​កាលពីថ្ងៃទី ៦ មករា ២០២១ បានបិទបញ្ចប់កម្មវិធីប្រកួតប្រជែង​​និស្សិតឆ្នើមមានគំនិតអាជីវកម្ម​ ដោយជ្រើសបាន​ម្ចាស់អាជីវកម្មជានិស្សិតមួយក្រុម​ជាម្ចាស់ពាន។

កម្មវិធីប្រកួតប្រជែង​នេះ​មាន​​​ឈ្មោះ​ជា​ភា​សា​រ​អង់​គ្លេស Global Student Entrepreneur Awards​ (GSEA)។ និស្សិត ៦ រូបដែល​តំណាងពីអាជីវកម្ម ៦ ផ្សេងគ្នា បានចូលរួមប្រកួតប្រជែងនៅវគ្គចុងក្រោយកាលពីថ្ងៃទី ៦ មករានេះ​ តាមរយៈការធ្វើបទបង្ហាញពីគំរូអាជីវកម្មរបស់ខ្លួនតាមអនឡាញ (Video Zoom)។

ឆ្លងតាមការវាយតម្លៃឲ្យពិន្ទុពីចៅក្រម​ជំនាញ ៥ រូប ម្ចាស់​ជ័យលាភីកម្មវិធីប្រកួតប្រជែងនេះបានទៅលើនិស្សិតឈ្មោះ តេង ស៊ាវប៉ោ តំណាងអាជីវកម្ម Fixh.me Co., Ltd. ដែលបង្កើតកម្មវិធី​ផ្តល់សេវាភ្ជាប់អ្នកផ្តល់សេវាទៅអ្នកដែលកំពុងប្រឈមមុខនឹងបញ្ហាក្នុងផ្ទះដូចជា ឧបករណ៍អគ្គិសនី ប្រព័ន្ធទឹក ឬ អគ្គិសនី​ជាដើម។ អាជីវកម្ម Fixh.me Co., Ltd. ត្រូវបានបង្កើតឡើងដោយក្រុមនិស្សិតពី Kirirom Institute of Technology (KIT)។

លោក ពឹង សេរី អនុ​ប្រ​ធាន​ Entrepreneurs’ ​Organization ប្រ​ចាំ​កម្ពុជា និងជាចៅក្រមវិនិច្ឆ័យមួយរូបក្នុងកម្មវិធីប្រកួតប្រជែងនេះ​បាន​ឲ្យ​ដឹង​ថា​​កម្ម​វិធី (GSEA) គឺ​ជា​កម្ម​វិ​ធី​ល្អដែល​សហ​គ្រិន​ ជា​និ​ស្សិត​​នៅ​កម្ពុជា​អាចមានឱកាស​ពង្រីក​បណ្តាញ​ទំ​នាក់​ទំ​នងជា​មួយ​សហ​គ្រិនពី​ប្រ​ទេស​នា​នា​​ជុំ​​វិញ​​ពិ​ភព​លោក និង​ដើម្បី​​​ទទួល​បាន​ចំ​ណេះ​ដឹង​ និង​បទពិ​សោធន៍​ថ្មី​​ៗ​​ពី​សហ​គ្រិន​ឆ្នើមដែល​ជា​ចៅ​ក្រម។

ចៅក្រម​ជំនាញ ៥ រូប។ ឆ្វេងដៃទី១ លោក ពឹង សេរី

លោក​ថ្លែង​ថា​៖​«នៅ​ពេល​សហ​គ្រិន​វ័យ​ក្មេង​ មាន​ឱ​កាស​ក្នុង​ការ​ទទួល​បាន​ចំ​ណេះ​ដឹង​ និង​បទពិ​សោធន៍ថ្មី​ៗ​​ពី​អ្នក​ជំ​នាញ ពួក​គេ​នឹង​មាន​លទ្ធភាព​កាន់​តែ​ខ្លាំង​ក្នុង​ការ​ពង្រីក​អាជីវ​កម្មដើម្បី​​ផ្តល់​ប្រ​យោជន៍​កាន់​តែ​ធំ​ដល់សង្គម​និង​ប្រ​ទេស​ជាតិ ដែល​វា​នឹង​ឆ្លើយ​តប​នឹង​ទស្ស​នៈ​វិ​ស័យ​របស់​ EO នៅ​កម្ពុជា​»។

ម្ចាស់អាជីវកម្ម Fixh.me Co., Ltd ដែលឈ្នះជ័យលាភី Global Student Entrepreneur Awards​ (GSEA) នៅកម្ពុជានេះបានទទួលរង្វាន់ជាទឹក​ប្រាក់ ២ ៥០០ ដុល្លារ ដែលជាការឧបត្ថមពីក្រុមហ៊ុនអចលនទ្រព្យ Century 21 Zillion Holding។ (ការប្រគល់រង្វាន់នឹងធ្វើឡើងនាពេលក្រោយ)

អាជីវកម្ម Fixh.me Co., Ltd នឹង​ទៅ​ចូល​រួ​ម​ប្រ​ជែង​ជា​មួយ​ជ័យ​លា​ភី​ពី​ប្រ​ទេស​ផ្សេង​ៗ​នៅ​ក្នុង​កម្ម​វិ​ធីប្រ​កួត​ប្រ​ជែង​វគ្គ​ផ្តាច់​ព្រ័ត្រ ហើយរាល់​ការ​ចំ​ណាយ​​រួម​មាន​ ថ្លៃ​ស្នាក់​នៅ ហូប​ចុក និង ធ្វើ​ដំ​ណើរ​ គឺជា​ការ​រ៉ាប់​រង​ដោយ​ EO។ ​​។ ជ័យ​លាភី​លេខ​មួយនៅ​វគ្គ​ផ្តាច់​ព្រ័ត្រកម្រិតអន្តរជាតិ​​នឹង​ទទួល​បានរង្វាន់​ជា​ទឹក​ប្រាក់ ២៥ ០០០ ដុល្លារ​។

EO គឺ​​​ជា​បណ្តាញ​នៃ​ក្រុម​អ្នក​ជំនួញ​ធំ​ៗ​​លើ​ពិភព​លោក ដែល​ត្រូវ​បាន​​​បង្កើត​ឡើង​នៅ​សហរដ្ឋ​អាមេរិក​ក្នុង​​​ឆ្នាំ ​១៩៨៧។ ស្ថា​ប័ន​នេះ​​កំពុង​មាន​វត្តមាន​​​ក្នុង​ប្រទេស​ចំនួន​ ៦១ ទូទាំង​ពិភព​លោក​​​ ដោយ​បច្ចុប្បន្ន​មាន​​ម្ចាស់​អាជីវកម្ម​​ និង​វិនិយោគិន​​ជាង​ ១៤ ០០០ ​នាក់​ទូទាំង​ពិភព​លោក​ជា​សមាជិក​។​

EO Cambodia ត្រូវ​បាន​បើក​ដំណើរ​ការ​ជា​ផ្លូវ​ការ​កាល​ពី​ថ្ងៃ​ទី ១៨ ធ្នូ​ឆ្នាំ ២០១៩ ដោយ​មាន​សមាជិក​ស្ថាបនិក​ជាម្ចាស់​អាជីវ​កម្ម​ធំ​ៗ​​ និង​ថ្នាក់​ដឹក​នាំ​ស្ថាប័ន​អាជីវ​កម្មធំ​ៗ​ប្រ​​ចាំ​កម្ពុជា៕


អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង