ការផ្គត់ផ្គង់ខុនដូនៅភ្នំពេញកើនដល់ជាង ១០ម៉ឺនយូនីតត្រឹមឆ្នាំ ២០២០

ប៊ុនធឿន 06/January/2021 18:03
ទស្សនា
ចែករំលែក

ភ្នំពេញ ចំនួនខុនដូ​សរុប​នៅទូទាំង ១៤ ខណ្ឌក្នុងរាជធានីភ្នំពេញ​បានកើនដល់ជាង ១០៩ ០៣៥ យូនីត គិតត្រឹមខែធ្នូឆ្នាំ ២០២០ ដែលកើនឡើងដល់ទៅជាង៧៦ ភាគរយបើធៀបនឹងកាលពីដំណាច់ឆ្នាំ ២០១៨។

ទិន្នន័យពីក្រុមហ៊ុន Z1 Data Co., LTD (Cambodia) ដែលជាក្រុមហ៊ុនឯកទេសខាងប្រើប្រាស់បញ្ញាសិប្បនិម្មិត (AI) ដើម្បីស្រាវជ្រាវ និងវិភាគទិន្នន័យក្នុងវិស័យអចលនទ្រព្យ បានបង្ហាញថា គម្រោងអភិវឌ្ឍន៍ខុនដូបានកើនឡើងសរុប ៥១៨ គម្រោង​គិតមកត្រឹមដំណាច់ឆ្នាំ២០២០ ស្មើនឹងខុនដូសរុបជាង ១០៩ ០៣៥ ​យូនីត។ ចំនួននេះ​កើនឡើងពីចំនួន ៦១ ៨០០ យូនីតកាលពីដំណាច់ឆ្នាំ២០១៨។

ទិន្នន័យពីក្រុមហ៊ុនដដែលបង្ហាញថាចំនួនខុនជាង១០ម៉ឺនយូនីតនេះ សម្រេចបានការលក់អស់ជាង ៥ម៉ឺន១ពាន់យូនីត ឬស្មើជាងពាក់កណ្តាលនៃការផ្គត់ផ្គង់សរុប។

ក្នុងចំណោមខណ្ឌទាំង១៤ នៅរាធានីភ្នំពេញ មានខណ្ឌចំនួនបីដែលមានការផ្គត់ផ្គង់​ខុនដូច្រើនជាងគេ គឺខណ្ឌចំការមន ខណ្ឌមានជ័យ និងខណ្ឌសែនសុខ។ បើបូកបញ្ជូលគ្នាខណ្ឌទាំងបីនេះមានការផ្គត់ផ្គង់ខុនដូរហូតដល់ទៅ ៦១ ៨០២ យូនីត ឬមានចំណែកស្មើនឹង៥៦ភាគរយនៃការផ្គត់ផ្គង់សរុប។

ការ​ផ្គត់ផ្គង់ខុនដូនៅទូទាំងរាជធានីភ្នំពេញត្រូវបានព្យាករណ៍ថានឹងកើនដល់ប្រមាណ ២៩៥ ០០០ យូនីត នៅត្រឹមដើមឆ្នាំ២០៣០ ពោលគឺកើនជិត៣ដង នៃចំនួនផ្គត់ផ្គង់នាពេលបច្ចុប្បន្ន។ នេះបើតាមរបាយការណ៍ព្យាករណ៍របស់ក្រុមហ៊ុន Vtrust Appraisal។​ របាយការណ៍ដដែលបញ្ជាក់ថា ជនជាតិចិន និង​ជនបរទេសមកពីតំបន់អាស៊ីផ្សេងទៀត ដែលមកប្រកបកិច្ចការ និងស្នាក់ នឹងមានចំណែកទិញខុនដូរច្រើនជាងគេ៕

តម្លៃខុនដូរត្រូវបានចែកចេញជា ៣ប្រភេទ ហើយបើតាមទិន្នន័យពីក្រុមហ៊ុន  CBRE Cambodia ក្នុងត្រីមាសទី៣បានបង្ហាញថា ខុនដូតម្លៃសមរម្យ (Affordable) មានតម្លៃដាក់លក់ជាមធ្យម ១៥០០ ដុល្លារក្នុងមួយម៉ែត្រការ៉េ ស្របពេលដែលខុនដូមធ្យម (Mid-Range) មានតម្លៃជាមធ្យម២៣០០ ដុល្លារក្នុងមួយម៉ែត្រការ៉េ។ ចំណែកឯខុនដូមានកម្រិតខ្ពស់ (High-End) មានតម្លៃជាមធ្យម ៣០០០ ដុល្លារក្នុងមួយម៉ែត្រការ៉េ។

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង