ភាសាខ្មែរ 
English 
ភ្នំពេញ៖ ប្រិតិបត្តិការទិញ-លក់អចលនទ្រព្យដែលមានតម្លៃក្រោម២លានដុល្លារនៅតែបន្តមានដំណើរការធម្មតានៅឆ្នាំ ២០២០នេះដោយសារការគាំទ្រដោយតម្រូវការពីអតិថិជនក្នុងស្រុក តែអចលនទ្រព្យដែលមានតម្លៃលើសពី២លានដុល្លារជួបការធ្លាក់ចុះ។ នេះបើតាមអ្នកជំនាញអចលនទ្រព្យ។
ថ្លែងក្នុងបទសម្ភាសន៍មួយជាមួយការសែតភ្នំពេញប៉ុស្តិ៍ចេញផ្សាយនៅថ្ងៃ ពុធ ខែវិច្ឆិកា ឆ្នាំ២០២០ លោក Richard W. Davidson ដែលទើបត្រូវបានតែងតាំងជាប្រធានក្រុមប្រឹក្សាភិបាលរបស់ក្រុមហ៊ុន Century 21 Cambodia បានឱ្យដឹងថា ទីផ្សារអចលនទ្រព្យដែលមានតម្លៃលើស ២ លានដុល្លារជាទីផ្សារដែលមានអតិថិជនភាគច្រើនជាជនបរទេស ហើយអតិថិជនគោលដៅនេះបានថមថយវត្តមាននៅកម្ពុជាដោយសារវិធានការប្រុងប្រយ័ត្នមួយចំនួនទាក់ទងនឹងការបង្ការជំងឺកូវីដ១៩។ លោកបន្តថា កត្តានេះបានធ្វើឲ្យសកម្មភាពជួញដូរអចលនទ្រព្យដែលមានតម្លៃលើ២ លានដុល្លារមានការថមថយគួរឲ្យកត់សម្គាល់នៅឆ្នាំ ២០២០ នេះ។
លោកថ្លែងថា៖ «ប្រជាជនកម្ពុជាដែលមានសាចប្រាក់ច្រើនក្នុងដៃ ពួកគាត់បន្តទិញចូលនាពេលនេះ ដើម្បីសម្រាប់លក់ទុកចំណេញនាពេលអនាគត។ ចំណែកឯប្រភេទអចលនទ្រព្យដែលពឹងផ្អែកលើអតិថិជនបរទេសបានធ្លាក់ចុះក្នុងឆ្នាំនេះដោយបញ្ហាជំងឺកូវីដ-១៩ ដែលធ្វើឱ្យមានការរឹតបន្តឹងការធ្វើដំណើរឆ្លងប្រទេស ហើយប៉ះពាល់ដល់ចំនួនអតិថិជនសក្ដានុពលពីក្រៅប្រទេសដូចជាជប៉ុន ចិន និងអ្នកទិញអន្តរជាតិផ្សេងទៀត»។
លោក Davidson មិនបានបង្ហាញទិន្ន័យជាក់លាក់ពីប្រតិបត្តិការទិញលក់អចលនទ្រព្យទាំងពីរប្រភេទតម្លៃនេះទេ តែបើតាមទិន្ន័យរបស់ក្រុមហ៊ុនអចលនទ្រព្យចិន Juwai បានបង្ហាញថា វិនិយោគិនចិនបានសាកសួរព័ត៌មាន(enquiries) ពីការទិញអចលនទ្រព្យនៅកម្ពុជាកើនឡើង 463.6 ភាគរយ គិតចាប់ពីខែកក្កដា ដល់ខែសីហា ឆ្នាំ២០២០។ ភាគច្រើននៃវិនិយោគិនទាំងនោះស្វែងរកអចលនទ្រព្យណាដែលមានតម្លៃចាប់ពី20,000 ដុល្លារ រហូតដល់ 250,000 ដុល្លារអាមេរិក។
ឆ្លងកាត់តាមបទពិសោធន៍ជាង៣០ ក្នុងវិស័យអចលនទ្រព្យលើឆាកអន្តរជាតិ លោកDavidson ក៏បានបង្ហាញទស្សនៈវិស័យរបស់លោកក្នុងទីផ្សារអចលនទ្រព្យនៅកម្ពុជាផងដែរ ដែលលោករំពឹងថា ទីផ្សារនេះនឹងស្ទុះងើបឡើងវិញនៅឆ្នាំ២០២១ នៅពេលដែលវ៉ាក់សាំងដាក់ឱ្យដំណើរការ ហើយនៅពេលនោះការរឹតបន្តឹងការធ្វើដំណើរអន្តរជាតិក៏នឹងលែងមានទៀត។
លោកបានគូសបញ្ជាក់ថា មានអតិថិជនបរទេសជាច្រើនសាកសួរព័ត៌មានពីឱកាសវិនិយោគនៅក្នុងប្រទេសកម្ពុជា ព្រោះជាទិសដៅមួយដែលអាចរកប្រាក់ចំណេញពីវិស័យអចលនទ្រព្យ ហើយត្រៀមជាស្រេចក្នុងការមកវិនិយោគនៅកម្ពុជា។
