ច្រកទ្វារព្រំដែនអន្តរជាតិព្រំកំពុងបង្កើនសក្តានុពលវិនិយោគវិស័យដីធ្លីក្នុងខេត្តប៉ៃលិន

ប៊ុនធឿន 07/October/2020 19:26
ទស្សនា
ចែករំលែក

ខេត្តប៉ៃលិន៖  តំបន់ច្រកទ្វារព្រំដែន​អន្តរជាតិព្រំក្នុងខេត្តប៉ៃលិន ដែលបម្រើដល់វិស័យពាណិជ្ជកម្មក្នុងការ​ធ្វើដំណើរ និងដឹកទំនិញចេញចូលជាមួយខេត្តចន្ទបូរីប្រទេសថៃ​ កំពុងមានការីកចម្រើនលើការអភិវឌ្ឍវិស័យពាណិជ្ជកម្ម។ ហើយភាពរីកចម្រើននេះបានជះឥទ្ធិពលជាវិជ្ជមានដល់វិស័យដីធ្លីនៅតំបន់ជុំវិញ។ នេះ​បើតាមអ្នកឯកទេសដីធ្លីប្រចាំខេត្តប៉ៃលិន។

បណ្តុំកាស៊ីណូនៅមាត់ច្រកព្រំដែនអន្តរជាតិព្រំ — ប៉ៃលិន-ចន្ទបូរី៖ រូបភាព សហការី

លោក ហេង តុងហៃ ប្រធានសាខាក្រុមហ៊ុន Century 21 Zillion Holding ប្រចាំខេត្តប៉ៃលិន បានឱ្យដឹង​ថា ច្រកព្រំដែនអន្តរជាតិនេះបានរួមចំណែកដ៏សំខាន់ក្នុងការជរុញកំណើនសេដ្ឋកិច្ចរបស់ខេត្ត តាមរយៈការ​ទាក់ទាញលើការវិនិយោគផ្សេងៗដូចជារមណីយដ្ឋាន ភោជនីយដ្ឋាន សណ្ឋារគារ​ និងជាពិសេស​កាស៊ីណូ។ លោកគូសបញ្ជាក់ថា កាស៊ីណូនៅច្រកព្រំដែនអន្តរជាតិមួយនេះមានប្រមាណ២០ កន្លែងរួមទាំងកាស៊ីណូខ្នាតតូច និងខ្នាតធំ។

លោក ហេង តុងហៃ ប្រធានសាខាក្រុមហ៊ុន Century 21 Zillion Holding ប្រចាំខេត្តប៉ៃលិន

លោកបានបន្តថា៖ «ដីធ្លីនៅតំបន់មាត់ច្រកព្រំដែននេះនៅតែមានហាងឆេងខ្ពស់ជាងគេ បើធៀបនឹងទីផ្សារដីធ្លីនៅក្នុង​ក្រុងប៉ៃលិន។ ហើយភាពរីកចម្រើននៅច្រកព្រំដែនអន្តរជាតិហ្នឹងក៏ធ្វើឱ្យតម្លៃដីនៅតំបន់នៅក្បែរៗនោះមានទីផ្សារល្អផងដែរ រួមទាំង​ដីសម្រាប់ធ្វើកសិសកម្ម។»

បើតាមអ្នកឯកទេសដីធ្លីរូបនេះ ទីផ្សារដីធ្លីនៅតំបន់មាត់ច្រព្រំដែនអន្តរជាតិព្រំ​មានតម្លៃចាប់ពី ៥០ម៉ឺនដុល្លារ ទៅ៨០ម៉ឺនដុល្លារក្នុងមួយហិកតា។ ខណៈដែលទីផ្សារដីធ្លីនៅក្នុងក្រុងប៉ៃលិនមានតម្លៃចន្លោះពី ៥០០ ទៅ ៥៥០ដុល្លារក្នុងមួយម៉ែត្រការ៉េ ចំណែកឯតំបន់ដែលនៅជាយៗក្រុងប៉ៃលិនមានតម្លៃជាមធ្យម៤០០ ដុល្លារក្នុងមួយម៉ែត្រការ៉េ។

លោកតុងហៃ បានបន្តថា ដ្បិតមិនទាន់មានការវិនិយោគលើវិស័យកសិកម្មទ្រង់ទ្រាយធំ តែការទិញ-លក់ដីធ្លីសម្រាប់បម្រើវិស័យនេះនៅតែមានតែកំណើនល្អ ព្រោះមានអំណោយទាំងការដាំដុះ និងងាយស្រួលក្នុង​ការនាំចេញតាមច្រកព្រំដែនអន្តរជាតិព្រំ។

ទិន្ន័យពីរ​ដ្ឋបាលខេត្តប៉ៃលិនបានបង្ហាញថា ផ្ទៃដីដាំដុះកសិកម្មក្នុងខេត្តនេះមាន ៧៥.៩៤៦ហិកតា។ បច្ចុប្បន្នខេត្តប៉ៃលិនមានដំណាំសំខាន់ៗបួនប្រភេទសម្រាប់ការផ្គត់ផ្គង់ក្នុងស្រុក និងការនាំចេញ មានដូចជា មៀនប៉ៃលិន (ឬតា​ងែន មានផ្ទៃដីដាំដុះ៤.៣៨៣ហិកតា) ស្វាយកែរមៀត (៥.៥៦៥ហិកតា) ដំណាំដំឡូងមី (៤២.១១០ហិកតា) និងពោតក្រហម(៧.៧៦១ហិកតា)។

ថ្លែងក្នុងសន្នសីទសារ​ព័ត៌មានស្តីពីវ​ឌ្ឍនភាពរបស់ខេត្តនាពេលថ្មីៗកន្លងទៅនេះ លោក ធូ ភា អភិរងខេត្តប៉ៃលិន មានប្រ​សាសន៍ថា៖«ដើម្បីប​ង្កើនកំណើនសេដ្ឋកិច្ចក្នុងខេត្ត រដ្ឋបាលខេត្តបានពង្រីកវិសាលភាពនៃការដាំដុះ និង​ស្វែងរកទីផ្សារក្នុងស្រុក និងការនាំចេញទៅកាន់ប្រទេសថៃ។ ដោយបានធានាបាននូវតម្លៃលើទីផ្សារនឹងនរនារយៈពេលប៉ុន្មានឆ្នាំចុងក្រោយនេះ។»

បើ​តាមលោកតុងហៃ តម្លៃដីធ្លីសម្រាប់បម្រើវិស័យកម្មស្ថិតក្នុងស្រុកសាលាក្រៅមានតម្លៃចាប់ពី ៣.០០០ រហូតដល់ ១២.០០០ ដុល្លារ​ក្នុងមួយហិកតា ដោយអាស្រ័យលើចំងាយនៃទីតាំងដី និងសណ្ឋានដីដែលអំណោយផលលើការដំាដុះ។

​ប៉ៃលិនជាអតីតទឹកដីក្រោមការគ្រប់គ្រងរបស់រដ្ឋបាលខេត្តបាត់ដំបង ហើយក្រោយមកត្រូវបានបង្កើតជាខេត្តប៉ៃលិននៅចុងឆ្នាំ២០០៨ ដែលមានសណ្ឋានដី ជាតំបន់ខ្ពង់រាប ហើយមានព្រៃភ្នំពណ៌ខៀវស្រងាត់ និងស្រស់បំព្រង។ ខេត្តប៉ៃលិនមានទំហំផ្ទៃដីសរុប ១.០៦២ គីឡូម៉ែត្រការ៉េ ហើយចែកចេញជាក្រុងប៉ៃលិន និងស្រុកសាលាក្រៅដែលមាន៤សង្កាត់ និង៤ឃុំ ភូមិចំនួន ៩០ ភូមិ។

ច្រកទ្វារព្រំដែនអន្តរជាតិព្រំ 

ទិដ្ឋភាពក្នុងក្រុងប៉ៃលិន

ទិដ្ឋភាពក្នុងក្រុងប៉ៃលិន

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង