ការចចារកិច្ចព្រមព្រៀងពាណិជ្ជកម្មស៊េរី កម្ពុជា-កូរ៉េ នឹងបញ្ចប់ឆាប់ៗនេះ

ប៊ុនធឿន 03/October/2020 13:45
ទស្សនា
ចែករំលែក

ភ្នំពេញ៖  កម្ពុជា និងសាធារណរដ្ឋកូរ៉េខាងត្បូង គ្រោងនឹងបញ្ចប់កិច្ចព្រមព្រៀង​ពាណិជ្ជកម្មស៊េរី(FTA) នៅត្រឹមដំណាច់ឆ្នាំ២០២០នេះ ហើយនឹងឈានដល់ការចុះកិច្ចព្រមព្រៀងជាផ្លូវការនាពេលខាងមុខ។

ការបញ្ជាក់នេះធ្វើឡើងបន្ទាប់ពីភាគីទាំងពីរ បានធ្វើការចរចារចំនួន២ជុំរួចមកហើយ តាមរយៈប្រពន្ធវីឌីអូកាលពីថ្ងៃទី ៣១ ខែ​សីហា ដល់ថ្ងៃទី០៣ ខែ​កញ្ញាឆ្នាំ២០២០ កន្លងទៅនេះ និង​ត្រៀមចរចារនៅ​ជុំបន្ទាប់។ នេះបើតាមសេក្តីប្រកាសព័ត៌មានរបស់ក្រសួងសេដ្ឋកិច្ច និ​ងហិរញ្ញវត្ថុ នៅថ្ងៃទី ២ ខែតុលា។

សេក្តីប្រកាសព័ត៌មានស្តីពីលទ្ធផលនៃការចរចារកិច្ចព្រមព្រៀងពាណិជ្ជកម្មស៊េរីកម្ពុជា-កូរ៉េ បានគូសបញ្ជាក់ថា កិច្ចព្រមព្រៀងនេះនឹងជួយបង្កើនពិពិធកម្មសេដ្ឋកិច្ចកម្ពុជាតាមរយៈការនាំចេញ និងបង្កើនការវិនិយោគនៅកម្ពុជា។

ក្រសួងសេដ្ឋកិច្ចបានលើកឡើង​ថា៖ «តាមរយៈកិច្ចព្រមព្រៀងនេះនឹងជួយឱ្យកម្ពុជាទទួលបាននូវទីផ្សារ​នាំចេញសម្រាប់ផលិតផលរបស់កម្ពុជាកាន់តែសំបូរបែប និង​ឱកាសកាន់តែប្រសើរជាងមុនលើការនាំចេញផលសក្តានុពលរបស់ខ្លួនទៅកាន់ទីផ្សារកូរ៉េ។»

ក្រសួងសេដ្ឋកិច្ចបានបន្តថា៖ «ក្រៅពីរបាំងពន្ធគយត្រូវបានកាត់បន្ថយនោះ វិធានការមិនមែនពន្ធ និង​វិធានការដើមកំណើតក៏ដូចជាបែបបទ និងនិតិវិធីពាក់ព័ន្ធនឹងពាណិជ្ជកម្ម ក៏ត្រូវបានធ្វើឱ្យប្រសើរឡើង និងមានលក្ខណៈប្រសើរជាងមុន ដើម្បីសម្រួលដល់ការធ្វើពាណិជ្ជកម្មរវាងប្រទេសទាំងពីរ។»

យោងតាមទិន្នន័យពីរដ្ឋាភិបាលកូរ៉េខាងត្បូងបានបង្ហាញថា ទំហំពាណិជ្ជកម្មរវាង​ប្រទេសទាំងពីរបានកើនដល់១ពាន់លានដុល្លារកាលពីឆ្នាំ២០១៩ កើនឡើង​៦ ភាគរយបើធៀបនឹងឆ្នាំ២០១៨។ ទំនិញនាំចូលពីកូរ៉េមកកម្ពុជាភាគច្រើន រថយន្តដឹកទំនិញ និងផលិតផលភេសជ្ជៈ ខណៈកម្ពុជានាំចេញទៅកូរ៉េភាគច្រើនជាផលិតផលសម្លៀកបំពាក់ និងស្បែកជើង។

ទន្ទឹមគ្នានេះដែរ កម្ពុជា​ និង​ប្រទេសចិន បានបញ្ចប់ការចរចារកិច្ចព្រមព្រៀងពាណិជ្ជកម្មស៊េរីនេះ ហើយតាមការ​គ្រោងទុកភាគីទាំងពីរនឹង​ចុះហត្ថ​លេខាលើកិច្ចព្រមព្រៀងនេះជាផ្លូវការក្នុងឆ្នាំនេះ។

បើតាមការគូសបញ្ចាក់ពីក្រសួងពាណិជ្ជកម្មកន្លងមក កម្ពុជាក៏មានផែនការចរចារលើកិច្ចព្រមព្រៀងដូចគ្នានេះជាមួយបណ្តាប្រទេសមួយចំនួនទៀតដូចជាប្រទេសជប៉ុន, ចក្រភពអង់គ្លេស ,ឥណ្ឌា, ម៉ុងហ្គោលី, សហភាព​សេដ្ឋកិច្ច​អឺរ៉ាស៊ាន ​(EAEU) និងសហរដ្ឋអាមេរិក។

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង