ភាសាខ្មែរ 
English 
ភ្នំពេញ៖ តំណាងក្រុមហ៊ុន Naga Corp ដែលគ្រប់គ្រងប្រតិបត្តិការកាស៊ីណូ Nagaworld នៅកម្ពុជា បានបញ្ជាក់ថាគម្រោងវិនិយោគរបស់ខ្លួននៅក្នុងខេត្តសៀមរាបនឹងមិនមានការរាប់បញ្ចូលកាស៊ីណូទេ ពោលគឺផ្តោតតែលើសណ្ឋាគារ និងរីហ្សតតែប៉ុណ្ណោះ។
យោងតាមសេចក្តីរាយការណ៍របស់សារព័ត៌មាន GGRAsia ដែលផ្តោតលើឧស្សាហកម្មកាស៊ីណូក្នុងតំបន់អាស៊ីចេញផ្សាយថ្ងៃទី១១ ខែកញ្ញានេះ បានឱ្យដឹងថា ក្រុមហ៊ុន Naga Corp បានអះអាងថារាល់ការវិនិយោគរួមគ្នាណាមួយរបស់ខ្លួននៅលើទឹកដីខេត្តសៀមរាបនឹងត្រូវអនុលោមតាមគោលនយោបាយរបស់រដ្ឋាភិបាលកម្ពុជា ដែលមិនអនុញ្ញាតឱ្យមានការវិនិយោគកាស៊ីណូក្នុងខេត្តនេះនោះទេ។
លោក Tim McNally អគ្គនាយកក្រុមហ៊ុន Naga Corp។ GGRASIA
លោក ទីម ម៉ាក់ណាល់លី (Tim McNally) អគ្គនាយកក្រុមហ៊ុន Naga Corp បានថ្លែងថា៖ «យើងបានដឹងជាយូរមកហើយថាខេត្តសៀមរាបត្រូវបានចាត់ទុកទីក្រុងវប្បធម៌។ ក្នុងន័យនេះ បំណងនៃការវិនិយោគរបស់យើងគឺនឹងសាងសង់ប្រភេទសណ្ឋាគារ និងរីស៊ត ដើម្បីបម្រើដល់ភ្ញៀវទេសចរមកពីជុំវិញពិភពលោកដែលមកទស្សនាកម្សាន្តនៅប្រាសាទអង្គវត្តដ៏ស្រស់ស្អាតអស្ចារ្យក្នុងខេត្តសៀមរាប។»
លោកបន្តថា៖ «យើងមិនដែលគិតថានឹងដាក់បញ្ចូលកាស៊ីណូរួមជាមួយការអភិវឌ្ឍសណ្ឋាគារ និងរីស៊តនៅក្នុងខេត្តសៀមរាបទេ។ ហើយយើងស្ងើចសរសើរ និងយល់ពីគោលនយោបាយរបស់រដ្ឋាភិបាលចំពោះទីតាំងប្រវតិសាស្រ្តដ៏សំខាន់នេះ។»
សេចក្តីស្រាយបំភ្លឺនេះធ្វើឡើងបន្ទាប់ពីក្រុមហ៊ុន Naga Corp ដែលជាក្រុមហ៊ុនចុះបញ្ជីក្នុងផ្សារភាគហ៊ុនក្រុងហុងកុង បានបង្ហើបបំណងពង្រីកអាជីវកម្មនៅក្នុងរបាយការណ៍ហិរញ្ញវត្ថុប្រចាំឆមាសរបស់ខ្លួនពីគម្រោងបើក Integrated Resort ទៅប៉ូលសេដ្ឋកិច្ចសំខាន់ៗពីររបស់កម្ពុជា គឺខេត្តព្រះសីហនុ និងខេត្តសៀមរាប។ (សូមចុចទីនេះអានព័ត៌មានបន្ថែម)
ក្រុមហ៊ុនគ្រោងអភិវឌ្ឍន៍រីហ្សតចម្រុះ (Integrated Resort) ក្នុងខេត្តទាំងពីរនេះ ដើម្បីបង្កើនប្រាក់ចំណូលរបស់ខ្លួន។ លោក Tim McNally បញ្ជាក់ថា ខេត្តសៀមរាបនឹងក្លាយជាការវិនិយោគដំបូងរបស់ក្រុមហ៊ុនលើវិស័យទេសចរណ៍ដែលមិនមែនជាល្បែងកាស៊ីណូ។ ខណៈដែលទីតាំងខេត្តព្រះសីហនុនឹងធ្វើការវាយតម្លៃក្រោយកូវីឌ-១៩។
កាសែតភ្នំពេញប៉ុស្តិ៍បានដកស្រង់សម្តីលោក ម៉ី វ៉ាន់ អគ្គនាយកនៃនាយកដ្ឋានឧស្សាហកម្មហិរញ្ញវត្ថុនៃក្រសួងសេដ្ឋកិច្ច និងហិរញ្ញវត្ថុ កាលពីដើមខែកញ្ញានេះថា ការវិនិយោគលើល្បែងកាស៊ីណូ នឹងមិនត្រូវបានអនុញ្ញាតឱ្យដំណើរអាជីវកម្មនៅតំបន់អង្គរក្នុងខេត្តសៀមរាបទេ។
