គម្រោងធំៗទាំងនេះនឹងជួយឱ្យខេត្តកំពតសម្រេចផែនការទាក់ទាញភ្ញៀវទេសចរ ២លាន៥សែននាក់

ខេត្តកំពត៖ គម្រោងធំៗមួយចំនួនដែលទាក់ទងនឹងការវិនិយោគលើវិស័យទេសចរណ៍ នឹងជួយជម្រុញកំណើនភ្ញៀវទេសចរទៅទស្សនាខេត្តកំពត ស្របពេលខេត្តជាប់សមុទ្រមួយនេះបានដាក់ផែនការទទួលភ្ញៀវទេសចរជាតិ និងអន្តរជាតិ ២លាន៥សែននាក់នៅឆ្នាំ២០២៣។

ឯកឧត្ដម ជាវ តាយ អភិបាលខេត្តកំពត កាលពីថ្ងៃទី៩ ខែកញ្ញា ឆ្នាំ២០២០ បានប្រកាសផែនការនេះ ដោយរំពឺងថានឹងទទួលបានកំណើនភ្ញៀវទេសចរណ៍អន្តរជាតិ៣សែន នៃចំនួនភ្ញៀវទេសសរុបដែលបានគ្រោងទុក។ ក្នុងឆ្នាំ២០១៩ ខេត្តកំពតទទួលភ្ញៀវទេសចរសរុប១លាន៦សែននាក់ ពោលគឺច្រើនជាងពាក់កណ្តាលនៃចំនួនភ្ញៀវទេសចរដែលបានគ្រោងទុកនៅបីឆ្នាំក្រោយ។

ឯកឧត្ដមបានគូសបញ្ជាក់ថា តាមរយៈផែនការអភិវឌ្ឍន៍ទេសចរណ៍រយៈពេល៥ឆ្នាំ (២០១៩-២០២៣) បានផ្តោតសំខាន់ទៅលើទិសដៅយុទ្ធសាស្ត្រដូចជា ការអភិវឌ្ឍន៍ផលិតផលទេចរណ៍, ការសិក្សាទីផ្សារ, ការផ្សព្វផ្សាយ ការតភ្ជាប់, ការសម្រួលការធ្វើដំណើរ និងការអភិវឌ្ឍន៍ហេដ្ឋារចនាសម្ព័ន្ធជាដើម។

ការដាក់ផែនការនេះ ស្របពេលដែលខេត្តកំពតកំពុងក្លាយជាទិសដៅសំខាន់ទាក់ទាញគម្រោងវិនិយោគធំៗជាច្រើន ជាពិសេសគម្រោងវិនិយោគដែលទាក់ទងនឹងវិស័យទេសចរ។ បច្ចុប្បន្នគម្រោងមួយចំនួនកំពុងចាប់ផ្តើមសាងសង់ និងខ្លះទៀតកំពុងត្រៀមខ្លួនឆាប់ៗនាពេលខាងមុខ។

ទី១) គម្រោងអភិវឌ្ឍបង្កើតតំបន់ឆ្នេរខ្សាច់ថ្មីសិប្បនិមិត្ត៖ គម្រោងនេះមានទីតាំងស្ថិតនៅភូមិកែបថ្មី ឃុំបឹងទូក ស្រុកទឹកឈូ ខេត្តកំពត ហើយអភិវឌ្ឍនលើផ្ទៃដី២៣៤ហិកតា ដែលជាគម្រោងវិនិយោគសហការរួមគ្នារវាងរដ្ឋបាលខេត្តកំពត និងក្រុមហ៊ុនឯកជន (IGB) Cambodia CO.LTD។ ការបែងចែកផលប្រយោជន៍នៃគម្រោងអភិវឌ្ឍន៍ តាមសមាមាត្រផ្ទៃដី ៦០% សម្រាប់ក្រុមហ៊ុន និងផ្ទៃដី ៤០% ទុកជូនរដ្ឋ ក្រោមការគ្រប់គ្រងរបស់រដ្ឋបាលខេត្តកំពត។ បើតាមការអះអាងពីឯកឧត្ដម ជាវ តាយ កន្លងមកខេត្តកំពតមានឆ្នេរសមុទ្រប្រវែង៧៦គីឡូម៉ែត្រ តែពុំទាន់មានឆ្នេរខ្សាច់សម្រាប់បម្រើភ្ញៀវទេសចរនៅឡើយ។ ប៉ុន្តែនៅក្នុងឆ្នាំ២០២១ឆ្នេរខ្សាច់នេះ នឹងត្រូវចាប់បើកដំណើរការសម្រាប់បម្រើភ្ញៀវទេសចរជាតិ និងអន្តរជាតិកម្សាន្ត។

ទីតាំងឆ្នេរខ្សាច់ថ្មី

ទី២) កំពង់ផែទេសចរណ៍៖ គម្រោងអភិវឌ្ឍន៍កំពង់ផែនេះគ្រោងបើកដំណើការនៅឆ្នាំ២០២១ ដែលនឹងក្លាយជាលំហូរទេសចរណ៍ផ្លូវទឹក ដ៏មានសក្តានុពលមួយក្នុងការទាក់ទាញភ្ញៀវទេសចរណ៍ក្នុងខេត្តកំពត។ ហើយអាចទទួលភ្ញៀវទេសចរប្រមាណ១ពាន់នាក់ក្នុងមួយថ្ងៃនៅពេលចាប់បើកដំណើការដំបូង។ កំពង់ផែទេសចរណ៍ថ្មីមួយនេះ មានទីតាំងស្ថិតនៅ ស្រុកទឹកឈូ ខេត្តកំពត គ្របដណ្តប់ផ្ទៃដីចំនួន ៤ ហិកតា ហើយចំណាយទឹកប្រាក់ ៨ លានដុល្លារ ដោយទទួលបានកម្ចីពីធនាគារអភិវឌ្ឍន៍អាស៊ី។

គម្រោងអភិវឌ្ឍន៍កំពង់ផែទេសចរណ៍ថ្មីក្នុងខេត្តកំពត

ទី៣) គម្រោងអភិវឌ្ឍន៍វីឡាលម្ហែកាយបែបធម្មជាតិខ្នាតធំដំបូងគេនៅខេត្តកំពត៖ ក្រុមហ៊ុន Forest Harmony កំពុងអភិវឌ្ឍន៍វីឡាលម្ហែកាយបែបធម្មជាតិ ៩០ វីឡាលើផ្ទៃដី ១៣ ហិកតា ដែលមានទីតាំងនៅភូមិទ្វារថ្មី ឃុំព្រៃថ្នង ស្រុកទឹកឈូ ខេត្តកំពត។ បើតាមការអះអាងពីក្រុមហ៊ុន គម្រោងនេះមានវីឡាលម្ហែកាយបែបធម្មជាតិ មានទេសភាពព្រៃភ្នំ និងព្រៃព្រឹក្សាស្រស់ស្អាត ដែលមានការចាប់អារម្មណ៍ពីសំណាក់ភ្ញៀវទាំងក្នុង និងក្រៅប្រទេសពីអាស៊ី និងអ៊ឺរ៉ុប ហើយបានមកទស្សនាទីនោះជាប្រចាំ។

ផ្លូវចូលទៅគម្រោងវីឡាលម្ហែកាយ Forest Harmony

ទី៤) មជ្ឈមណ្ឌលពាណិជ្ជកម្មជាប់មាត់សមុទ្រ៖ ក្រុមហ៊ុន Gold Coast International Development Co.,LTD គ្រោងបោះទុនវិនិយោគប្រមាណជិត ២៥លានដុល្លារ លើការសាងសង់មជ្ឈមណ្ឌលពាណិជ្ជកម្ម សណ្ឋាគារកម្រិតផ្កាយ៤ អាគារផ្សារទំនើប មណ្ឌលកំសាន្ត ខុនដូរ និងសេវាទេសចរណ៍។ ក្រុមហ៊ុននេះបានដាក់សំណើសុំវិនិយោគលើផ្ទៃដីទំហំ ៤២ ហិកតា ជាតំបន់ជាប់មាត់សមុទ្រ មានទីតាំងស្ថិតនៅភូមិថ្កូវ ឃុំឬស្សីស្រុកខាងលិចស្រុកកំពង់ត្រាច ខេត្តកំពត។

យោងតាមព័ត៌មានពីមន្ទីទេសចរណ៍ខេត្តកំពត បច្ចុប្បន្នខេត្តនេះមានតំបន់ទេសចរណ៍ចំនួន ១៧ កន្លែង ខណៈដែលសហគមន៍ទេសចរណ៍មានចំនួន ៤ កន្លែង និងគោលដៅទាក់ទាញ៤ កន្លែងដូចជា ចំការម្រេច ស្រែអំបិល សំណង់បេតិកភណ្ឌ និងសក្តានុពលទេសភាពដងព្រែក។ ភ្ញៀវទេសចរមកទស្សនាក្នុងខេត្តកំពតមានការកើនឡើងជារៀងរាល់ឆ្នាំក្នុងរង្វង់ចន្លោះពី ៣ ទៅ៥% ។