ភាសាខ្មែរ 
English 
ខេត្តកណ្តាល៖ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងចំនួន ១២ ក្នុងខេត្តកណ្តាលនៅរយៈពេល៨ខែដំបូងឆ្នាំ ២០២០ នេះដែលមានទុនវិនិយោគសរុបជាង ២១៩ លានដុល្លារ។
យោងតាមការចេញផ្សាយរបស់ CDC ដែលជាស្ថានប័នរដ្ឋាភិបាលក្នុងការពិនិត្យនិងសម្រេចគម្រោងវិនិយោគនានាដែលត្រូវបានលើកទឹកចិត្តដោយរដ្ឋាភិបាល គម្រោងទាំង ១២ នេះត្រូវបានអនុម័តពីខែមករា ដល់ សីហា ហើយអាចបង្កើតការងារសរុបជាង ១ ម៉ឺននាក់។
ប្រភពដដែលបានបន្តថា គម្រោងវិនិយោគទាំងនេះភាគច្រើនផ្តោតលើវិស័យឧស្សាហកម្ម ដូចជារោងចក្រកាត់ដេរសម្លៀកបំពាក់ ស្បែកជើង កាបូប និងរោងចក្រផលិតកេសកាតុង។ ក្រៅពីនេះ ក៏មានរោងចក្រផលិត និងផ្គុំដំឡើងបន្ទះសូឡា និងរោងចក្រផលិតស្រាបៀរ និងភេសជ្ជៈមួយកន្លែងផងដែរ។
គម្រោងទាំងនេះរាយប៉ាយក្នុងស្រុកមួយចំនួនក្នុងខេត្តកណ្តាល មានដូចជាស្រុកអង្គស្នួល ស្រុកពញាឮ ស្រុកកោះធំ ស្រុកកណ្តាលស្ទឹង និងសង្កាត់សិត្បូ ក្រុងតាខ្មៅ។ ក្នុងនោះស្រុកអង្គស្នូល ទទួលបានគម្រោងវិនិយោគច្រើនជាងគេ រហូតដល់ ៧គម្រោងនៃគម្រោងវិនិយោគសរុប។
ស្រុកអង្គស្នូល ស្ថិតនៅប៉ែកខាងលិចនៃរាជធានីភ្នំពេញ តាមបណ្តោយជាតិលេខជាតិលេខ៤ ដែលជាការតភ្ជាប់រវាងប៉ូលសេដ្ឋកិច្ចពីររបស់កម្ពុជាគឺ រាជធានីភ្នំពេញ និងខេត្តព្រះសីហនុ។
រោងចក្រឧស្សាហកម្មមួយកន្លែងស្ថិតនៅម្តុំខាងក្រោយផ្សារអង្គស្នូល
យោងតាមទិន្ន័យបច្ចុប្បន្នភាពរបស់រដ្ឋបាលខេត្តកណ្តាលដែលចេញផ្សាយកាលពីចុងខែ ឧសភា ឆ្នាំ២០២០ បានបង្ហាញថា ខេត្តនេះមានរោងកច្រសហគ្រាសចំនួនសរុប ២៥០ មូលដ្ឋាន មានដូចជាផ្នែកកម្មន្តសាលវាយនភ័ណ្ឌ សម្លៀកបំពាក់ ផលិតផលពីស្បែក និងផ្នែកផ្សេងៗទៀត។ ប្រភពដដែលបានគូសបញ្ជាក់ថា សេដ្ឋកិច្ចខេត្តនេះទទួលបានពីវិស័យកសិកម្ម ៣៨,៧% ឧស្សាហកម្ម ៣៤,២% និងសេវាកម្ម ២៧,១%។
ខេត្តកណ្តាលមានក្រុងមួយ និងស្រុកចំនួន១០ ដែលរាយប៉ាយនៅជុំវិញរាជធានីភ្នំពេញ។ បើតាមអ្នកឯកទេសដីធ្លី បានអះអាងថា ភូមិសាស្រ្តខេត្តកណ្តាលនេះមានសក្តានុពលខ្ពស់សម្រាប់ការវិនិយោគដីធ្លីនាពេលបច្ចុប្បន្ន ហើយទទួលបានចំណេញខ្ពស់នាពេលអនាគត ព្រោះការរីកសាយនៃការអភិវឌ្ឍក្រុង នឹងជួយបង្កើនតម្លៃទីផ្សារដីធ្លី។
គួររំលឹកផងដែរថា សាលារាជធានីភ្នំពេញកាលពីដើមឆ្នាំ ២០១៩ បានស្នើឱ្យម្ចាស់រោងចក្រ សហគ្រាស ឃ្លាំងស្ដុកទំនិញ និងយានដ្ឋានធំៗត្រូវរៀបចំប្ដូរទីតាំងទៅជាយក្រុងតាមផ្លូវក្រវាត់ក្រុងទី៣ នៅឆ្នាំ២០២១ ពោលគឺបន្ទាប់ពីផ្លូវក្រវ៉ាត់ក្រុងមួយនេះសាងសង់រួចរាល់។
