ភាសាខ្មែរ 
English 
ភ្នំពេញ៖ ក្រុមហ៊ុន Naga Corp ដែលគ្រប់គ្រងប្រតិបត្តិការកាស៊ីណូ Nagaworld នៅកម្ពុជា បានបង្ហើបពីបំណងពង្រីកអាជីវកម្មរបស់ខ្លួនទៅប៉ូលសេដ្ឋកិច្ចសំខាន់ៗពីររបស់កម្ពុជា គឺខេត្តព្រះសីហនុ និងខេត្តសៀមរាប។ នេះបើតាមរបាយការណ៍ហិរញ្ញវត្ថុប្រចាំឆមាសរបស់ក្រុមហ៊ុនដែលបានចេញផ្សាយចុងសប្តាហ៍មុន។
សេចក្តីជូនដំណឹងរបស់ក្រុមហ៊ុន Naga Corp ដែលជាក្រុមហ៊ុនចុះបញ្ជីក្នុងផ្សារភាគហ៊ុនក្រុងហុងកុង បានឱ្យដឹងថាក្រុមហ៊ុនគ្រោងអភិវឌ្ឍន៍រីស៊តចម្រុះ (Integrated Resort) ក្នុងខេត្តសៀមរាប និងខេត្តព្រះសីហនុដើម្បីបង្កើនប្រាក់ចំណូលរបស់ក្រុមហ៊ុន។ Integrated Resort ជាទូទៅគឺសំដៅលើអាជីវកម្មដែលបណ្តុំដោយសណ្ឋាគារ កាស៊ីណូ និងសាលសន្និសីទ និងហាងលក់រាយខ្នាតអន្តរជាតិជាដើម។ យ៉ាងណាក៏ដោយ Integrated Resort ខ្លះ ក៏មិនមានកាស៊ីណូដែរ តែក្នុងកម្រិតភាគតិច។
របាយការណ៍ដែលមានកម្រាស់២៥ទំព័រនេះរបស់ Naga Corp បានបញ្ជាក់ថា គម្រោងអភិវឌ្ឍថ្មីនេះនឹងជួយផ្សព្វផ្សាយ និងលើកកម្ពស់វិស័យទេសចរណ៍នៅកម្ពុជា។
ក្រុមហ៊ុនបានលើកឡើងថា៖ «នេះជាបំណងរបស់ក្រុមហ៊ុន ដែលត្រូវបានមើលឃើញថាជាអ្នកអភិវឌ្ឍន៍រីស៊តចម្រុះដែលមានលក្ខណៈទូលំទូលាយ និងប្រកបដោយគុណភាព ជាមួយនឹងការផ្តោតលើការបង្កើតប្រភពចំណូលមិនមែនល្បែងផងដែរ។ យើងរំពឹងថា ការអភិវឌ្ឍរីស៊តចម្រុះដែលរួមបញ្ជូលទាំងល្បែង និងមិនមែនល្បែង នឹងជួយយឹតយោងគ្នាទៅវិញទៅមក។»
របាយការណ៍របស់ក្រុមហ៊ុនមិនទាន់ពន្យល់លម្អិតពីផែនការអភិវឌ្ឍន៍រីស៊តក្នុងតំបន់ប៉ូលសេដ្ឋកិច្ចទាំងពីរនេះនៅឡើយទេ ហើយបច្ចុប្បន្នក្រុមហ៊ុននេះកំពុងបន្តអភិវឌ្ឍគម្រោង Naga 3 របស់ខ្លួន ហើយគ្រោងនឹងបញ្ចប់នៅឆ្នាំ ២០២៥។
យោងតាមរបាយការណ៍ប្រចាំឆមាស ប្រាក់ចំណូលដុលពីអាជីវកម្មល្បែង (GGR) របស់ NagaWorld នៅឆមាសទី ១ ឆ្នាំនេះមាន ៣៧២ លានដុល្លារ ថយចុះក្នុងរង្វង់ ៥៧ ភាគរយបើធៀបនឹងរយៈពេលដូចគ្នាកាលពីឆ្នាំមុនដែលមានប្រមាណ ៨៧២លានដុល្លារ។
គួររំឮកថា លោក រស់ ភិរុណ អនុប្រធាននាយកដ្ឋានឧស្សាហកម្មហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុ ធ្លាប់បានបញ្ជាក់ថា រដ្ឋាភិបាលកម្ពុជាមិនអនុញ្ញាតឲ្យមានការវិនិយោគលើកាស៊ីណូនៅសៀមរាបនោះទេ។
សម្រាប់អ្នកជំនាញទីផ្សារដីធ្លីក្នុងខេត្តសៀមរាប និងខេត្តព្រះសីហនុ យល់ឃើញថា ប្រសិនបើមានការអភិវឌ្ឍគម្រោងរីស៊តទាំងនោះមែនដូចអ្វីដែលក្រុមហ៊ុនបានគ្រោង នោះនឹងជួយបង្កើនសក្តានុលពលវិនិយោគនិងតម្លៃទីផ្សារដីធ្លីក្នុងខេត្តទាំងពីរនេះកាន់តែល្អប្រសើរ។
