ស្វែងយល់ចំណុចទាំងនេះសិន មុនសម្រេចចិត្តវិនិយោគលើវិស័យដីធ្លី

មិនថាតែការវិនិយោគលើវិស័យដីធ្លី ឬការវិនិយោគលើវិស័យណាមួយនោះទេ មូលដ្ឋាននៃចំណេះដឹងសម្រាប់ការវិនិយោគ ជាកត្តាសត្យានុម័ត​ និងចាំបាច់ ដែលលោកអ្នកគួរស្វែងយល់ឱ្យបានច្បាស់ ដើម្បីឱ្យការវិនិយោគនោះទទួលបាននូវភាពសមប្រកប​។​​

លោក វ៉ា វីរៈ ដែលជាអ្នកជំនាញអចលនទ្រព្យអន្តរជាតិ ​បានផ្តល់ពីដំបូន្មានសំខាន់ៗមួយចំនួនដើម្បីជាប្រទីបដល់ប្រិយមិត្តអ្នកអាន​កើតជាប្រយោជន៍ សម្រាប់ចំណេះដឹងវិនិយោគលើវិស័យដីធ្លី ក្នុងការបញ្ចៀសហានិភ័យផ្សេងៗ និងជាគន្លឹះ​វិនិយោគដើម្បី​ទទួលបានផលចំណេញ​។

១) គោលបំណង​ (Goal or Purpose)

លោក វីរៈ បានលើកឡើងថា លោកអ្នកត្រូវមាន​គោលដៅច្បាស់លាស់ ថាតើការទិញដីនោះក្នុងគោលបំណងជាការវិនិយោគលើការអភិវឌ្ឍ​គម្រោងដូចជារីសត ឬលំនៅដ្ឋាន, ទិញដើម្បីវិនិយោគបង្កើតជាលំហូរសាច់ប្រាក់ (cash flow) ឬមួយទិញទុកដើម្បីយកចំណេញ ពេលដែលអចលនទ្រព្យនោះឡើងថ្លៃ (capital appreciation)​។

២) ស្វែងយល់ពីទំហំទឹកប្រាក់ក្នុងការវិនិយោគ (Budget and Finance)

បន្ទាប់ពីលោកអ្នកដឹងពីគោលបំណង​នៃការវិនិយោគនោះហើយ លោកអ្នកត្រូវសិក្សាពីលទ្ធភាពនៃ​ចំនួនទឹកប្រាក់ដែលលោកអ្នកអាចលៃលកក្នុងការ​ទិញ។ ហើយថាតើការវិនិយោគនោះប្រើប្រាស់លុយខ្លួនឯងសុទ្ធ ឬក៏ការខ្ចីបុលមួយផ្នែកណាមួយពីធនាគារមកកវិនិយោគ ដែលត្រង់ចំណុចនេះលោកអ្នកត្រូវចេះថ្លឹងថ្លែងពី​លទ្ធភាពក្នុងការដោះស្រាយទៅលើបញ្ហាសងត្រលប់។ សណ្ឋានដី  ក៏ជាកត្តាសំខាន់ផងដែរ ដែលលោកអ្នកគួរពិចារណា ហើយដើម្បីដឹងពីសណ្ឋានដីនោះ ត្រូវចេះប្រើ Google Map, Google Earth និងបន្ទាប់មកគឺ​ត្រូវទៅមើលទីតាំងជាក់ស្តែង។​

៣) ទីតាំងយុទ្ធសាស្រ្ត (Location)

ទីតាំងជាកត្តាស្លាប់រស់ នៅពេលដែលលោកអ្នកទិញអចលនទ្រព្យ ព្រោះតម្លៃគឺ​អាស្រ័យលើទីតាំងសក្តានុពល ដែលនេះមានន័យថា លោកអ្នកគួរសម្លឹងមើលទីតាំងដីដែលឋិតនៅតាមបណ្តោយផ្លូវធំ ឬទីតាំងឋិតនៅកែងកាច់ជ្រុង។ ដូច្នេះការ​ទិញអចលនទ្រព្យជាដី លោកអ្នកគួរទិញកន្លែងណាដែលជាទីតាំងយុទ្ធសាស្រ្ត។ ជាថ្មីម្តងទៀត ដូចអ្វីដែលរៀបរាប់ក្នុងចំណុចទីមួយ អ្វីដែលសំខាន់អាស្រ័យលើគោលបំណង​​ ថាតើការទិញដីនោះសម្រាប់ការធ្វើវិស័យកសិកម្ម ឬសម្រាប់ការវិនិយោគលើម្រោងផ្តោតលើវិស័យទេសចរណ៍។

«អចលនទ្រព្យ ប្រៀបដូចជាការថើប។ អ្វីដែលសំខាន់បំផុតនោះគឺ​ ទីតាំង»

“Real Estate is like kissing. The most important thing is location”

៤) ការបែងចែកតំបន់ (Zoning and Protected Zone)

បន្ទាប់ពីលោកអ្នកដឹងពីគោលបំណងនៃការទិញ ហើយត្រូវទិញនៅកន្លែងណា​។ ដូច្នេះ ការស្វែងយល់ពីការបែងចែកតំបន់នេះគឺជារឿងសំខាន់ ដែលលោកអ្នកត្រូវសិក្សាពីផែនការមេ (master plan) ថាតើតំបន់នោះ ជាតំបន់លំនៅដ្ឋាន ពាណិជ្ជកម្ម កសិកម្ម ឬឧស្សាហកម្ម។ មួយវិញទៀត លោកអ្នកក៏ត្រូវដឹង និងប្រុងប្រយ័ត្នផងដែរចំពោះទីតាំងដីមួយចំនួន ដូចជាទីតាំងដែលឋិតក្នុងតំបន់ការពារ (ការកំណត់កម្ពស់ក្នុងការសាងសង់) ឧទ្យានជាតិ ឬជាតំបន់បេតិកភណ្ឌ ជាដើម។

៥) ហេដ្ឋារចនាសម្ព័ន្ធ (Utilities)

 ប្រសិនបើលោកអ្នកទិញដីក្នុងបំណងអភិវឌ្ឍលំនៅដ្ឋាន ចាំបាច់ត្រូវមើលទៅលើទីតាំងដីនោះមានហេដ្ឋារចនាសម្ព័ន្ធគ្រប់គ្រាន់ដែរឬទេ ដូចជាបណ្តាញគមនាគមន៍ (ផ្លូវថ្នល់) បណ្តាញទឹក(ស្អាត) ភ្លើង និងបណ្តាញលូជាដើម។

៦) ផ្លូវច្បាប់ (Legal)

ត្រង់ចំណុនេះលោកអ្នកត្រូវពិនិត្យទៅលើទិដ្ឋភាពផ្លូវច្បាប់ ថាតើទីតាំងដីនោះជាប្លង់ទន់ រឺប្លង់រឹង ហើយទីតាំងដីនោះមានជម្លោះដែរឬទេ។ ព្រោះប្រសិនបើលោកអ្នកទិញចំទីតាំងដីជាប់បណ្តឹងនៅអាជ្ញាធរ ឬតុលាការ សុរិយោដីនឹងមិនអាចផ្ទេរឈ្មោះឱ្យបាននោះទេ។

«វិនិយោគអចលនទ្រព្យ ទទួលបានប្រាក់​ចំណេញឬក៏ខាត គឺអាស្រ័យនៅពេលដែលយើងទិញ។​ ហេតុដូច្នេះ ពេលទិញ គឺ​ត្រូវប្រុងប្រយ័ត្នបំផុត មានន័យថា បើទិញត្រូវចំណុច អាចចំណេញបានច្រើន។​ តែបើទិញខុស កុំថាឡើយប្រាក់ចំណេញ សូម្បីតែរួចខ្លួនក៏មិនអាចផង»  

លោក វ៉ា វីរៈ អ្នកជំនាញអចលនទ្រព្យអន្តរជាតិ និងជាគ្រូបង្វឹកមួយរូបប្រចាំក្រុមហ៊ុន Century 21 Zillion Holding បានចូលរួមចែករំលែកចំណេះដឹងក្នុងយុទ្ធនាការផ្សព្វផ្សាយឱកាសការងារ និងវិនិយោគអចលនទ្រព្យ នាពេលកន្លងមក