ខេត្តកំពតរំពឹងទទួលកំណើនភ្ញៀវយ៉ាង​គំហុក​នៅថ្ងៃឈប់សម្រាករយៈពេលវែងនៅខែក្រោយ

ប៊ុនធឿន 28/July/2020 16:45
ទស្សនា
ចែករំលែក

ខេត្តកំពត​៖ តំណាង​សហគមន៍អេកូទេសចរណ៍សំខាន់មួយនៅខេត្តកំពត​រំពឹងថានឹងមានកំណើនទេសចរក្នុងស្រុកទៅទស្សនាខេត្តកំពត និងតំបន់ទេសចរបែបធម្មជាតិយ៉ាងគម្ហក់នាថ្ងៃឈប់សម្រាករយៈពេលវែងខាងមុខ​ដោយសារកិច្ចសហការផ្សព្វផ្សាយ និងនាំភ្ញៀវពីក្រុមហ៊ុនភ្នាក់ងារទេសចរ។

លោក សឹម ហ៊ីម ប្រធានសហគមន៍ទេសចរណ៍ត្រពាំងសង្កែ បានថ្លែងប្រាប់បណ្តាញព័ត៌មាន​អចលនទ្រព្យ​ Z1 News នៅថ្ងៃទី ២៨ កក្កដានេះ​ថា​ សហគមន៍មួយនេះតែងទទួលភ្ញៀវទេសចរប្រមាណ ៥០០ នាក់ក្នុងមួយថ្ងៃសម្រាប់ថ្ងៃចុងសប្តាហ៍ធម្មតា ហើយរំពឹងថាចំនួននេះនឹងកើនទ្វេដងដល់ ១០០០ នាក់ក្នុងមួយថ្លៃសម្រាប់ថ្ងៃឈប់សម្រាកនៅខែសីហាខាងមុខ។

លោកថ្លែងថា៖«ឥឡូវ​នេះ​ សូម្បីតែ​ថ្ងៃសម្រាកចុង​សប្តាហ៍យើ​ងក៏ស្ទះកន្លែងសា្នក់នៅដែរ ហើយ​ទម្រាំថ្ងៃឈប់សម្រាកខែក្រោយ ប្រហែលជាអាចច្រើនជាងការរំពឹងទុក»។

កំណើនភ្ញៀវជាបន្តបន្ទាប់នៅសហគមន៍អេកូទេសចរណ៍ត្រពាំង​សង្កែនេះ គឺបន្ទាប់សហគមន៍នេះបានចុះអនុស្សារណៈយោគយល់គ្នាជាមួយក្រុមហ៊ុនទេសចរណ៍ឆាមមីង ខេមបូឌា ធួរ កាលពីពេលថ្មីៗនេះ ក្នុងកិច្ចសហការផ្សព្វផ្សាយ និងបញ្ជូនភ្ញៀវទេសចរជាតិ និងអន្តរជាតិទៅកាន់សហគមន៍នេះ។ កិច្ចសហការនេះអនុញ្ញាត្តិឲ្យក្រុមហ៊ុនទេសចរណ៍ឆាមមីង ខេមបូឌា ធួរ ដាក់បញ្ចូលសហគមន៍អេកូទេសចរណ៍ត្រពាំង​សង្កែជាគោលដៅផ្សព្វផ្សាយដំណើរទស្សនៈកិច្ចទេសចរនិងអចលនទ្រព្យនៅខេត្តកំពត ដោយភ្ជាប់ដំណើរកម្សាន្តរបស់ភ្ញៀវទេសចរជាមួយគម្រោងវីឡាលម្ហែកាយ Forest Harmony ដែលជាគម្រោងវីឡាលម្ហែកាយ ៩០ វីឡាលើផ្ទៃដី ១៣ ហិកតាស្ថិតនៅតាម​បណ្តោយផ្លូវជាតិលេខ៣ ចម្ងាយប្រមាណ ១៨គីឡូម៉ែត្រពីទីរួមខេត្តកំពត។

លោក សឹម ហ៊ីម អង្គុយខាងស្តាំ ក្នុងពិធីចុះអនុស្សារណៈយោគយល់។ រូបភាព៖ Z1News

ស្របពេលដែលរដ្ឋាភិបាល​កម្ពុជាបា​នកំណត់យក​ថ្ងៃទី ១៧ ដល់់ថ្ងៃទី ២១​ ខែសីហា​ (រយៈពេលប្រាំថ្ងៃ) សម្រាប់ជាថ្ងៃ ឈប់សម្រាកជំនួសបុណ្យចូលឆ្នាំថ្មីប្រពៃណីជាតិដែលត្រូវបានផ្អាក​កន្លងមក តំបន់ទេសចរទាំងពីរខាងលើ និងទីតាំងនានានៅខេត្តកំពតនឹងមានភ្ញៀវទេសចរកាន់តែច្រើនឡើង។

មាន​ចំងាយ​ប្រហែល ៧ គីឡូម៉ែត្រពីទីរួ​មខេត្តកំពត​ ​​សហគមន៍ទេសចរណ៍ត្រពាំងសង្កែមានបម្រើសេវាកម្មទេសចរណ៍មួយចំនួនដូចជា ជិះទូកកាណូតទស្សនាព្រៃកោងកាងតាមព្រែកត្រពាំងសង្កែ សេវាកម្មស្នាក់នៅ និងសេវាកម្មម្ហូបអាហារ ពិសេសគឺមានកូនកោងកាងសម្រាប់លក់ឱ្យភ្ញៀវទិញយកទៅដាំទុកជាអនុស្សាវរីយ៍ផងដែរ។ សម្រាប់ថ្លៃសេវាកម្មស្នាក់នៅតម្លៃ ១២ ដុល្លារក្នុងមួយបន្ទប់គេងក្នុងមួយយប់។

លោកប្រធាន​មន្ទីទេសចរណ៍ខេត្តកំពត សយ ស៊ីណុល ធ្លាប់បានបញ្ជាក់ថាកិច្ចព្រមព្រៀងលើអនុស្សារណៈយោគយល់គ្នារបស់ក្រុមហ៊ុនភ្នាក់ងារទេសចរ និងសហគមណ៍ទេសចរណ៍ត្រពាំងសង្កែនឹងជួយទាក់ទាញភ្ញៀវទេសបន្ថែមទៀតមកខេត្តកំពត ហើយការអភិវឌ្ឍន៍គម្រោងវីឡាលំហែកាយរបស់ក្រុមហ៊ុន Forest Harmony បានជួយបង្កើតផលិតផលទេសចរថ្មីដែលកំពុងទាក់ទាញភ្ញៀវទេសចរបន្ថែមទៀតមកកម្សាន្តនិងស្នាក់នៅខេត្តកំពតឲ្យបានយូរជាងមុន ៕

សម្រស់ធម្មជាតិតាមបណ្តោយព្រែកត្រពាំងសង្កែ ឆ្ពោះទៅព្រៃកោងកាង។ រូបភាព៖ Z1News

សហគមន៍អេកូទេសចរណ៍ត្រពាំងសង្កែ។ រូបភាព៖ Z1News

ផ្លូវចូលទៅគម្រោងវីឡាលម្ហែកាយ Forest Harmony។ រូបភាព៖ Z1News

ទីតាំងគម្រោងវីឡាលម្ហែកាយ Forest Harmony។ រូបភាព៖ Z1News

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង