រដ្ឋបាលខេត្តកំពង់ស្ពឺកំពុងជំរុញវត្តមានរោងចក្រថ្មីៗឲ្យដាក់ទីតាំងនៅទីនេះឲ្យកាន់តែច្រើន

ប៊ុនធឿន 24/July/2020 16:40
ទស្សនា
ចែករំលែក

ខេត្តកំពង់ស្ពឺ៖ រដ្ឋបាលខេត្តកំពង់ស្ពឺកំពុងជំរុញគម្រោងវិនិយោគរោងចក្រថ្មីៗឱ្យដាក់​ទីតាំង​តាមបណ្តោយផ្លូវជាតិលេខ ៤៤ បន្ថែមលើទីតាំងរោងចក្រដែលមានស្រាប់ ដែលនឹងបង្កើតឱកាសថ្មីៗដល់តំបន់ជុំវិញ។

បច្ចុប្បន្ន គេសង្កេតឃើញថាតាម​បណ្តោយផ្លូវជាតិ​លេខ ៤១ មានចំនួនរោងចក្រច្រើនជាងគេក្នុងខេត្តកំពង់ស្ពឺ​ ខណៈដែលទីតាំងស្ថិតនៅតាមបណ្តយផ្លូវជាតិ​លេខ ៤៤ នៅមានរោងចក្រតិចតួចនៅឡើយ​។

ឯកឧត្តម វ៉ី សំណាង អភិបាលខេត្តកំពង់ស្ពឺ បានមានប្រសាសន៍កាលពីពេលថ្មីៗនេះថា វិនិយោគិនថ្មីៗនៅតែបន្តស្នើសុំការវិនិយោគលើរោងកច្រក្នុងខេត្តកំពង់ស្ពឺនាពេលនេះ ហើយរដ្ឋបាលខេត្តបានលើកទឹកចិត្តឲ្យម្ចាស់គម្រោងទៅវិនិយោគនៅតាមបណ្តោយផ្លូវជាតិលេខ ៤៤ ដើម្បីបង្កើតឱកាសការងារដល់ប្រជាជនក្នុងតំបន់នោះ។

ឯកឧត្តមសំណាងថ្លែងថា៖«រោងចក្រដែលវិនិយោគនេះមិនមែនមាន​តែនៅស្រុកគងពិសីទេ គឺយើង​ខិតខំទាក់ទាញអ្នកវិនិយោគដាក់នៅស្រុកគងពិសី និងស្រុកបរសេដ្ឋ (តាមបណ្តយផ្លូវជាតិលេខ ៤១) … ហើយឥឡូវនេះ យើងខិតខំរុញទៅផ្លូវលេខ ៤៤ ហើយប៉ុន្មានថ្ងៃនេះខ្ញុំបានចុះហត្ថលេខា[អនុម័ត]លើរោងចក្រពីរបន្ថែមទៀតក្នុងដំណាក់កាលកូវីដ-១៩  អោយទៅវិនិយោគនៅតំបន់នោះ។”

យោងតាមទិន្នន័យពីរដ្ឋបាលខេត្តកំពង់ស្ពឺ នៅទូទាំងខេត្តមានរោងចក្រធុនធំចំនួន ១៦១រោងចក្រ ដោយប្រើប្រាស់កម្លាំងពលកម្មសរុបចំនួនជាង ១២ ម៉ឺននាក់។ រោងចក្រកំពុងដំណើរការមានចំនួន          ១៤៣  កន្លែង ខណៈរោងចក្រកំពុងសាងសង់មានចំនួន ១៨កន្លែងបន្ថែមទៀត​។ តួរលេខនេះ បើគិតត្រឹមដើមខែកក្កដា ឆ្នាំ២០២០ ។

ផ្លូវជាតិ​លេខ ៤៤ ជាផ្លូវឆ្លងកាត់ក្រុងច្បារមន និងស្រុកចំនួន ៤ របស់ខេត្តកំពង់ស្ពឺ មានដូចជាស្រុងសំរោងទង ស្រុកឱរ៉ាល់ ស្រុកថ្ពង និងស្រុកឧត្តុង្គ តភ្ជាប់ទៅផ្លូវជាតិលេខ៥ ឆ្លងកាត់ខេត្តកំពង់ឆ្នាំង ពោធិ៍សាត់ បាត់ដំបង និង ខេត្តបន្ទាយមានជ័យ ដែលជាច្រករបៀងសេដ្ឋកិច្ចដ៏សំខាន់របស់កម្ពុជា ក្នុង​ការធ្វើពាណិជ្ជកម្ម និងដឹកជញ្ជូនជាមួយប្រទេសថៃ។  ​ចំណែកឯ ផ្លូវជាតិលេខ ៤១​ តភ្ជាប់ជាមួយនឹងខេត្តកំពត​។​

លោក ប៊ូ សេងហ៊ួ ប្រធានសាខាក្រុមហ៊ុន Century 21 Zillion Holding ប្រចាំខេត្តកំពង់ស្ពឺ ដែលចុះស្រាវជ្រាវពីផ្សារអចលទ្រព្យក្នុងខេត្តនេះ បានឱ្យដឹងថា តំបន់ផ្លូវជាតិលេខ ៤៤ និង​តាមផ្លូវ ៤១ ជាទីតាំងដែលមានគម្រោងវិនិយោគ​រោងចក្រឧស្សាហកម្ម និងគម្រោងថ្មី។ ​

លោកបានបន្តថា៖«ក្រៅពីគំរោងចក្រឧស្សាហកម្ម តំបន់ទាំងពីរ​នេះក៏បានទាក់ទាញគំរោងអភិវឌ្ឍលំនៅឋានមួយចំនួនផងដែរ ហើយសកម្មភាពទាំងនេះបានរួមចំណែកយ៉ាងសំខាន់ដល់ការទិញ-លក់ដីធ្លីនៅជុំវិញតំបន់ក្បែរនោះ”។

លោក ប៊ូ សេងហ៊ួ ប្រធានសាខាក្រុមហ៊ុន Century 21 Zillion Holding ប្រចាំខេត្តកំពង់ស្ពឺ

របាយការណ៍សន្ទស្សន៍ដីធ្លីក្នុងកំពង់ស្ពឺរបស់ក្រុមហ៊ុន VTrust Appraisal ដែលជាក្រុមហ៊ុន​​ឯ​ក​ទេសខាងវាយតម្លៃអចលនទ្រព្យបានបង្ហាញថា តម្លៃដីធ្លីនៅតាមបណ្តោយផ្លូវជាតិ​លេខ ៤៤ ដែលមានចំងាយពីទី​រួមខេត្តប្រមាណ ៧ គីឡូម៉ែត្រ អាចមានតម្លៃ ១ម៉ឺន ៣ ពាន់ដុល្លារ​ក្នុង​មួយម៉ែត្រដើរ (ទំហំដីក្បាលដី ១៥ ម៉ែត្រ និងមានបណ្តោយចន្លោះពី ៦៥ ទៅ ៧០​ ម៉ែត្រ)។ សម្រាប់ទីតាំងដែលនៅក្បែរោងចក្រ មានតម្លៃរហូតដល់ទៅ ២ ម៉ឺន​ដុល្លារក្នុង​មួយម៉ែត្រដើរ (ទំហំក្បាលដីចន្លោះពី ៨០ ទៅ ១០០ ម៉ែត្រ និងមានបណ្តោយ៦០ ម៉ែត្រ) ។

របាយការណ៍៍ដដែលបានបន្ថែមថា​ តម្លៃដីនៅតាមបណ្តោយផ្លូវជាតិ​លេខ ៤១ ចាប់ពីចំណុចហួសផ្សារវត្តអង្គ មានតម្លៃដាក់លក់ (asking price) ចន្លោះពី ២៥ ទៅ ៣០ ដុល្លារក្នុងមួយម៉ែត្រការ៉េ​។ ប៉ុន្តែតម្លៃលក់ជាក់ស្តែងអាចថយនៅត្រឹម ២១ ទៅ ២២ ដុល្លារ​ក្នុងម៉ែត្រការ៉េប៉ុណ្ណោះ។ ដោយឡែកទីតាំងដែលក្បែរៗរោងចក្រ ស្ថិតនៅតាមបណ្តោយផ្លូវជាតិលេខ ៤១ នេះអាចមានតម្លៃចន្លោះពី ៥០ ទៅ ៧០ ដុល្លារក្នុងមួយម៉ែត្រការ៉េ។

លោកអោក គ្រី ប្រធានផ្នែកស្រាវជ្រាវ និងវាយតម្លៃអចលនទ្រព្យរបស់ក្រុមហ៊ុន VTrust Appraisal ប្រចាំខេត្តកំពង់ស្ពឺបានឱ្យដឹងថា គិតមកទល់ពេលនេះទីផ្សារដីធ្លឺនៅតាមបណ្តោយផ្លូវជាតិ ៤១ មានសកម្មភាពលេចធ្លោជាងគេ តែតម្លៃទី​ផ្សារ​ដីធ្លី​ក្នងតំបន់ទាំងពីរមិនទាន់មានការប្រែប្រួលខ្លាំងទេធាបនឹងឆ្នាំមុន។

លោកថ្លែងថា៖«យើងសង្កេតឃើញថា ការទិញ-លក់ដីធ្លីតាមបណ្តោយផ្លូវជាតិលេខ ៤១ មានសកម្មភាពច្រើនជាងតំបន់ផ្លូវជាតិលេខ ៤៤ ព្រោះមានភ្ញៀវជាច្រើនចង់បានដីនៅតាមបណ្តោយផ្លូវជាតិលេខ ៤១ ជាពិសេសសម្រាប់ទុកធ្វើជាឃ្លាំងស្តុកទំនិញ”។

កាលពីឆ្នាំ ២០១៩ ទុន​វិនិយោគលើវិស័យសំណង់ក្នុងខេត្តកំពង់ស្ពឺមានប្រមាណជាង​ ២១០ លានដុល្លារអាមេរិក ខណៈការ​វិនិយោគលើវិស័យរោងច​ក្រឧស្សាហកម្មកំពុង​រីកដុះដាលក្នុងខេត្តនេះ។

ទិដ្ឋភាពតាមបណ្តោយផ្លូវជាតិលេខ ៤៤ ក្នុងខេត្តកំពង់ស្ពឺ ឆ្លងកាត់ក្រុងច្បារមន និងស្រុកចំនួន ៤ របស់ខេត្តនេះ ដែលតភ្ជាប់ជាមួយផ្លូវជាតិលេខ៥។ រូបភាព៖ Z1News

រោងចក្រមួយចំនួនកំពុងដំណើរការស្ថិតនៅតាមបណ្តោយផ្លូវជាតិលេខ ៤៤។ រូបភាព៖ Z1News

ទិដ្ឋភាពទូទៅស្ថិតនៅតាមបណ្តោយផ្លូវជាតិលេខ ៤៤។ រូបភាព៖ Z1News

រោងចក្រសហគ្រាសស្ថិតនៅតាមបណ្តោយផ្លូវជាតិលេខ ៤១។ រូបភាព៖ Z1News

ទិដ្ឋភាពតាមបណ្តោយផ្លូវជាតិលេខ ៤១ ឆ្ពោះទៅខេត្តកំពត។ រូបភាព៖ Z1News

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង