គម្រោងស្ថាបនាផ្លូវ ៣៤ ខ្សែក្នុងក្រុងព្រះសីហនុដែលសម្រេចស្ទើរទាំងស្រុងទាក់ទាញក្រុមហ៊ុនអចលនទ្រព្យយីហោដើមពីអាមេរិក

ព្រះសីហនុ៖ គម្រោងស្ថាបនាផ្លូវ ៣៤ខ្សែក្នុងក្រុងព្រះសីហនុ ដែលចំណាយទឹកប្រាក់ ៣០០ លានដុល្លារ បានសម្រេចស្ទើរទាំងស្រុងហើយគិតមកទល់ពេលនេះ ដែលកំពុងធ្វើឲ្យទីក្រុងកំពង់ផែរបស់កម្ពុជាមួយនេះកាន់តែទាក់ទាញសម្រាប់គម្រោងពាណិជ្ជកម្មធំៗ។
ការវិវត្តន៍នេះបានទាក់ទាញចំណាប់អារម្មណ៍ក្រុមហ៊ុនធំៗជាច្រើន ហើយជាក់ស្តែងក្រុមហ៊ុនអចលនទ្រព្យលំដាប់ពិភពលោកមួយបានជ្រើសរើសខេត្តព្រះសីហនុជាទីតាំងចាប់ផ្តើមយុទ្ធនាការផ្សព្វផ្សាយចំណេះដឹងផ្នែកអចលនទ្រព្យនៅថ្ងៃសុក្រសប្តាហ៍ក្រោយនេះ។

សេចក្តីប្រកាសព័ត៌មានរបស់គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា  កាលពីថ្ងៃ១៧ កក្កដាឆ្នាំ ២០២០ បានបញ្ជាក់ថា គម្រោង​អភិវឌ្ឍន៍ផ្លូវទ្រង់ទ្រាយធំ​នេះសម្រេចបានការចាក់ប៉េតុង​ ៩៩.៩២ ភាគរយគិត​ត្រឹមថ្ងៃទី ១៧ កក្កដា។​ ខណៈដែលការដាក់លូសម្រេចបានជាស្ថាពរ និង​ហេដ្ឋាសម័្ពន្ធផ្សេងៗកំពុងបង្កើនល្បឿនដើម្បីបញ្ចប់តាមការគ្រោងទុក។

គម្រោងស្ថាបនាផ្លូវនេះនឹងរួមចំណែកប្រែក្លាយខេត្តមួយនេះ​ជាប៉ូលអភិវឌ្ឍជាតិប្រកបដោយចីរភាព​តាមរយៈការអភិវឌ្ឍទីក្រុងទំនើប ការៀបចំជាតំបន់សេដ្ឋកិច្ចពិសេសគម្រូពហុបំណង និងការរៀបចំជាមជ្ឈមណ្ឌលឧស្សាហកម្ម ផលិតកម្មបែបបច្ចេកវិទ្យាទំនើបជាដើម។​

ការវិវត្តន៍ដ៏ល្អនេះ រួមផ្សំនឹងសក្តានុពលខ្ពស់របស់ខេត្តព្រះសីហនុ បានទាក់ទាញក្រុមហ៊ុនអចលនទ្រព្យយីហោដើមពីអាមេរិក Century 21 Zillion Holding ជ្រើសយកខេត្តព្រះសីហនុជាទីតាំងដំបូងគេបន្ទាប់ពីភ្នំពេញដើម្បីរៀបចំសិក្ខាសាលាបណ្តុះភាពជោគជ័យ 3800 នាក់ សម្រាប់អ្នកឯកទេសដីធ្លីប្រចាំតំបន់ខេត្តព្រះសីហនុ។

សិក្ខាសាលានេះនឹងធ្វើឡើងនៅសណ្ឋាគារ Sokha Hotels & Resorts ក្រុងព្រះសីហនុ ដោយបើកឲ្យមានការចូលរួម​ដោយសេរី និងឥតគិតថ្លៃ សម្រាប់អ្នកមានចំណាប់អារម្មណ៍ស្វែងយល់ពីវិស័យអចលនទ្រព្យ និង ឱកាសកាងារពីវិស័យនេះដោយទទួល​បានការចែករំលែកចំណេះដឹងពីវាគ្មិនជំនាញៗ៤រូប។

អ្នកមានចំណាប់អារម្មណ៍ត្រូវចុះឈ្មោះជាមុនសិនតាម Link នេះ។