ទឹកប្រាក់នៃការនាំចេញសរុបនៅតែកើន បើទោះបីជាផលិតផលកាត់ដេរធ្លាក់ចុះក្តី

ហ៊ គីមសាយ 08/July/2020 14:20
ទស្សនា
ចែករំលែក

ភ្នំពេញ៖ ការនាំចេញទំនិញសរុបរបស់កម្ពុជាទៅទីផ្សារ​អន្តរជាតិនៅរក្សាបានកំណើនវិជ្ជមានក្នុងរយៈពេល ៥ខែ​ដំបូង​ក្នុ​ងឆ្នាំនេះ បើទោះបីជាផលិតផលនាំចេញសំខាន់គឺផលិតផលកាត់ដេរបានធ្លាក់ចុះក្តី។ នេះបើយោងតាមមន្រ្តីជាន់ខ្ពស់ក្រសួងសេដ្ឋកិច្ច និង​ហិរញ្ញវត្ថុ។ ​

ការរក្សាបានអត្រាកំណើនវិជ្ជមានក្នុងអំឡុងពេលនេះគឺជារឿងគួរសាទរ ព្រោះថាចរន្តសេដ្ឋកិច្ចប្រទេសជាច្រើនកំពុងប្រឈមការលំបាកដោយសារការីករាលដាលជំងឺសកលកូវីដ-១៩។

ថ្លែងក្នុងសន្និសីទ​ស្តីពីវិធានការទ្រទ្រង់ ស្តារ និងជំរុញកំណើនសេដ្ឋកិច្ចដែលធ្វើឡើងនៅព្រឹកថ្ងៃពុធទី ៨ កក្កដានេះ ឯកឧត្តម ​វង្សី វិស្សុត រដ្ឋលេខាធិការប្រចាំការ ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា​ ទឹកប្រាក់នៅការនាំចេញទំនិញគ្រប់មុខបូកបញ្ចូលគ្នានៅតែបន្តកំណើនក្នុងរយៈពេលប្រាំខែនេះ​ បើធៀបនឹងរយៈពេលដូចគ្នាកាលពីឆ្នាំមុន។ ​

លោកបានថ្លែងថា៖«​ការ​នាំចេញផលិតផលសម្លៀកបំពាក់មានការធ្លាក់ចុះក៏ពិតមែន ប៉ុន្តែទឹកប្រាក់នៃការនាំចេញទំនិញសរុបទាំងអស់របស់កម្ពុជា [ទៅកាន់ទីផ្សារអន្តរជាតិ] នៅតែវិជ្ជមានដដែល»។ ឯកឧត្តម វិស្សុត មិនបានគូសបញ្ជាក់ចំនួនទឹកប្រាក់នៃការនាំចេញជាក់ស្តែងនោះទេ តែលោកអះអាងថាការនាំចេញ អង្ករ កង់ ផលិតផលគ្រឿងអេឡិចត្រូនិច និងវត្ថុធាតុដើមក្នុង​វិស័យកសិកកម្មកើនឡើង ដែលបានជួយប៉ះប៉ូវដល់ការធ្លាក់ចុះការនាំចេញផលិតផលសម្លៀកបំពាក់។

ឯកឧត្តម វង្សី វិស្សុត រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ ក្នុងសិន្និសិទ្ធនៅថ្ងៃពុធនេះ

ការនាំចេញផលិតផលសម្លៀកបំពាក់ ការបូប និង​ស្បែកជើងពីកម្ពុជាទៅទីផ្សារអន្តរជាតិនៅក្នុងរយៈពេល ៦ ខែដំបូងឆ្នាំនេះ​មានទឹកប្រាក់សរុបជាង ៣.៧​ ពាន់ដុល្លារ គឺធ្លាក់ចុះ ៥.៤ ភាគរយ​បើធៀបនឹងទឹកប្រាក់កាលពីឆមាសទី ១​ ឆ្នាំមុន។ នេះបើតាមទិន្នន័យពី ឯកឧត្តម ​ហេង សួរ រដ្ឋលេខាធិការ​ក្រសួងការងារ និងបណ្ដុះបណ្ដាលវិជ្ជាជីវៈ។

ការថយចុះនេះដោយសារការថមថយការលក់ចេញទំនិញទៅទីផ្សារអ៊ឺរ៉ុប បើទោះបីជាការនាំចេញទៅអាមេរិកនៅរក្សាកំណើនក្តី។

យោងតាម​ទិន្នន័យ​ពី​​ការិយា​ល័យជំរឿន​សហរដ្ឋ​អាមេរិក​ ការនាំចេញទំនិញពីកម្ពុជាទៅអាមេរិកក្នុង​រយៈពេល៥ខែ​ឆ្នាំ ២០២០មានទឹកប្រាក់ ២,៣ ពាន់លានដុល្លារ គឺកើនឡើងរហូតដល់ទៅ ២៦ ភាគរយ បើធៀបនឹងរយៈពេលដូចគ្នាកាលពីឆ្នាំមុន៕

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង