ក្រុមហ៊ុនថៃសម្រេចកិច្ចព្រមព្រៀងនាំយកហាងលក់រាយ 7-Eleven មកកម្ពុជា

ភ្នំពេញ៖ ហាងលក់រាយលំដាប់អន្តរជាតិ 7-Eleven នឹងមានវត្តមានជាលើកដំបូងនៅកម្ពុជានៅឆ្នាំ 2021 តាមរយៈ​ក្រុមហ៊ុនដ៏ធំមួយរបស់ថៃឈ្មោះ CP Group បន្ទាប់ពីកិច្ចព្រមព្រៀងទិញលក់ Franchise ជាមួយក្រុមហ៊ុនដើមនៅអាមេរិកបានបញ្ចប់រួចរាល់។

សេចក្តីជូនដំណឹងរបស់ក្រុមហ៊ុន CP Group ដែលជាក្រុមហ៊ុនមេគ្រប់គ្រងប្រតិបត្តិការហាងលក់រាយ 7-Eleven នៅប្រទេសថៃបានផ្សព្វផ្សាយនៅថ្ងៃព្រហស្បតិ៍ទី ៧ ឧសភានេះថា ក្រុមហ៊ុនបុត្រសម្ព័ន្ធរបស់ខ្លួនគឺ CP All (Thailand) ទើបសម្រេចកិច្ចព្រមព្រៀងទទួលសិទ្ធិផ្តាច់មុខសម្រាប់ដំណើរការអាជីវ​កម្មហាង 7-Eleven នៅកម្ពុជាពីក្រុមហ៊ុនដើម 7-Eleven, Inc នៅអាមេរិក។ កិច្ចសន្យានេះមានសពុលភាពរយៈពេល ៣០ ឆ្នាំ ហើយភាគីទំាងពីរព្រមព្រៀងថាអាចបន្តរយៈពេល ២០ ឆ្នាំទៀត។

សេចក្តីជូនដំណឹងបញ្ជាក់ថា ហាងលក់ទំនិញ 7-Eleven ដំបូងគេនៅកម្ពុជានឹងបើកដំណើរការនៅឆ្នាំ 2021 ខាងមុខ។

ហាងលក់ទំនិញ 7-Eleven នៅថៃត្រូវបានបើកសាខាដំបូងគេកាលពីឆ្នាំ 1989 ហើយគិតមកទល់ពេលនេះមានហាងសរុប 12 000 ហាង ដែលជាប្រទេសមួយមានហាង 7-Eleven ច្រើនជាងគេទីពីរបន្ទាប់ពីប្រទេសជប៉ុន។ ចំនួនហាង​ 7-Eleven លើពិភពលោកមានចំនួន 70678 ហាងគិតត្រឹមខែមីនា។

ការចូលមកដល់របស់ក្រុមហ៊ុន 7-Eleve នាពេលនេះ​នឹងធ្វើឲ្យការប្រកួតប្រជែងរវាង ​​ហាង​លក់​ទំ​និញ​រាយ​បែប​ទំ​នើបកាន់តែខ្លាំងក្លា​នៅ​កម្ពុជាទាំងក្នុងចំណោមហាងជាម៉ាកក្នុងស្រុក និងហាងម៉ាកកម្រិតអន្តរជាតិ។

ហាង​ Circle K ដែល​មាន​មូល​ដ្ឋាន​នៅ​អាមេរិក បាន​បើក​ដំ​ណើរ​ការ​នៅ​កម្ពុជាកាល​ពី​ខែ កុម្ភៈ​ឆ្នាំ ២០១៨ ហើយ​គិត​មក​ទល់​ពេល​នេះ​បាន​ពង្រីក​ទី​តាំងជាបន្តបន្ទាប់។

ហាងលក់រាយបែបទំនើបរបស់ជប៉ុន ​Aeon Maxvalu Express ​ក៏មានវត្តមាននៅកម្ពុជាស្រាប់ហើយ និងបានពង្រីក​ទី​តាំង​ជា​បន្ត​បន្ទាប់។ ក៏មានហាងលក់រាយបែបទំនើបជាច្រើនទៀតផងដែរដូចជា Lucky Express, Smile Mart, Kiwi Mart, Panda Mart, Chip Mong Supermarket ជាដើម។