ភាសាខ្មែរ 
English 
ភ្នំពេញ៖ ក្រុមហ៊ុនម៉ៅការសាងសង់របស់កូរ៉េខាងត្បូង Hyundai Engineering ទើបបានឈ្នះការដេញថ្លៃលើគម្រោងសាងសង់ផ្សារទំនើបអ៊ីអន 3 (AEON III) ដែលជាគម្រោងផ្សារទំនើបខ្នាតធំរបស់ជប៉ុននៅលើទឹកដីកម្ពុជា។
យោងតាមសេចក្តីរាយការណ៍របស់សារព័ត៌មានកូរ៉េ The Korea IT Times កាលពីថ្ងៃច័ន្ទ គម្រោងផ្សារទំនើបអ៊ីអន 3 (AEON III) មានទឹកប្រាក់ ១៦៥ លានដុល្លារ ហើយនឹងត្រូវសាងសង់អគារផ្សារទំនើបកម្ពស់ ៥ជាន់ មានផ្ទៃក្រលាសរុប ១៧០ ០០០ ម៉ែត្រការ៉េ។ គម្រោងនេះអាចត្រូវការរយៈពេលសាងសង់ ២៧ ខែ បន្ទាប់ពីចាប់ផ្តើមបើកការដ្ឋានសាងសង់។
ក្រុមហ៊ុនម៉ៅការសាងសង់របស់កូរ៉េខាងត្បូង Hyundai Engineering នេះក៏ជាក្រុមហ៊ុនឈ្នះការដេញថ្លៃសាងសង់ផ្សារទំនើប អ៊ីអន សែន សុខ (AEON II) ដែលបានបើកដំណើរការកាលពីឆ្នាំ ២០១៨ ផងដែរ៕
គម្រោងផ្សារទំនើប អ៊ីអន ៣ នេះមានទីតាំងតាមបណ្តោយមហាវិថីសម្តេចតេជោហ៊ុនសែន ចម្ងាយប្រមាណ ៤,៥ គីឡូម៉ែត្រពីស្ពានអាកាសក្បាលថ្នល់។ គម្រោងនេះបានទទួលការលើកទឹកចិត្តជាផ្លូវការពីរដ្ឋាភិបាលកម្ពុជាហើយ ដោយក្រុមប្រឹក្សាអភិវឌ្ឍន៍កម្ពុជា (CDC) បានសម្រេចផ្តល់សិទ្ធជាស្ថាពរដើម្បីធ្វើឲ្យគម្រោងនេះក្លាយជាគម្រោងមានគុណសម្បត្តិគ្រប់គ្រាន់ដើម្បីទទួលបានប្រព័ន្ធលើកទឹកចិត្តនានាពីរដ្ឋាភិបាល។
