ភាសាខ្មែរ 
English 
ជប៉ុន៖ តម្រូវការផ្ទះស្នាក់នៅសម្រាប់លំហែកាយនៅប្រទេសជប៉ុនបានកើនឡើងខ្លាំងនៅឆ្នាំនេះ ដោយសារប្រជាជនជាច្រើនព្យាយាមគេចចេញពីទីក្រុងប្រជុំជនដើម្បីបញ្ចៀសពីហានិភ័យការឆ្លងជម្ងឺ Covid-19។
ប្រជាជនជប៉ុនដែលមានផ្ទះទីពីរ (ប្រភេទផ្ទះសម្រាប់វិស្សមកាលតាមជនបទ) គិតមកទល់ពេលនេះ ចាប់ផ្តើមចូលរស់នៅផ្ទះទីពីររបស់ពួកគេច្រើនជាងឆ្នាំកន្លងទៅដែលភាគច្រើនប្រើប្រាស់សម្រាប់ជាកន្លែងធ្វើការពីផ្ទះទៅ។ នេះបើយោងតាមសាព័ត៌មានជប៉ុនដ៏ល្បីមួយ Nikkei Asian Review។
យោងតាមសេចក្តីរាយការណ៍ដដែល មជ្ឈមណ្ឌលផ្ទះលំហែកាយសម្រាប់វិស្សមកាលនានានៅជប៉ុន ជារៀងរាល់ឆ្នាំត្រូវរង់ចាំដល់ខែឧសភា ទើបមានឃើញម្ចាស់ផ្ទះមករស់នៅសម្រាកកាយច្រើនដោយសារអំឡុងបុណ្យសម្រាក Golden Week នៅចុងខែឧសភានិងដើមខែមិថុនា។ តែនៅឆ្នាំនេះ ផ្ទះ ៣០ភាគរយមានអ្នកចូលនៅរួចហើយគិតមកទល់ពេលនេះ។
និន្នាការនេះត្រូវបានគេមើលឃើញនៅក្នុងតំបន់ផ្ទះលំហែកាយដ៏ពេញនិយមជាច្រើនដូចជា Nasu នៅ Tochigi Prefecture និង Ito នៅខេត្ត Shizuoka។ Nasu ជាដំបន់ដែលល្បីល្បាញសម្រាប់ការឡើងភ្នំកម្សាន្ត កសិដ្ឋាន សួនសត្វ និង រមណីយដ្ឋាន។
ក្រុមហ៊ុន Towa Nasu Resort ជាក្រុមហ៊ុនដែលគ្រប់គ្រងផ្ទះលំហែកាយ ៥៥០ បានទទួលការហៅទូរស័ព្ទចំនួន ២៣០ ក្នុងរយៈពេល ៥ សប្តាហ៍កន្លងមកនេះ គឺច្រើនជាងឆ្នាំមុនទៅទៀតបើទោះបីជារដូវកាលពេញនិយមមិនទាន់មកដល់ក្តី។
នាយកគ្រប់គ្រងក្រុមហ៊ុនលោក Goshi Yazawa មានប្រសាសន៍ថា៖«អ្នកខ្លះកំពុងចៀសវាងមេរោគឆ្លង Corona អ្នកខ្លះទៀតយកផ្ទះនេះជាកន្លែងធ្វើការ ធ្វើជំនួញផ្សេងៗ» ។
ផ្ទះលំហែកាយនៅតំបន់ Amagi Kogen ដែលល្បីល្បាញដោយសារការមើលឃើញទេសភាព ៣៦០ ដឺក្រេបានគេរស់នៅពេញអស់ហើយទោះបីជាមានអាកាសធាតុត្រជាក់យ៉ាងណាក៏ដោយ។
