ភាសាខ្មែរ 
English 
ភ្នំពេញ៖ ខណ្ឌទួលគោកកំពុងប្រែខ្លួនយ៉ាងលឿនរហ័សពីតំបន់សម្រាប់តែរស់នៅ មកជាតំបន់សម្រាប់ធ្វើពាណិជ្ជកម្ម ដែលបានធ្វើឲ្យតម្លៃដីតំបន់នេះកើនឡើងគួរឲ្យកត់សម្គាល់នៅពីរទៅបីឆ្នាំចុងក្រោយ។ នេះបើយោងតាមអ្នកជំនាញក្នុងវិស័យអចលនទ្រព្យ។
លោកស្រី ហ្រែ្គស រចនីហ្វុង អគ្គនាយិកាក្រុមហ៊ុន Century 21 Cambodia ដែលជាក្រុមហ៊ុនអចលនទ្រព្យមួយមានម៉ាកយីហោដើមពីសហរដ្ឋអាមេរិក បានលើកឡើងថាខណ្ឌទួលគោកកំពុងតែមានការអភិវឌ្ឍខ្លួនយ៉ាងលឿនដោយមានអគារពាណិជ្ជកម្មកាន់តែច្រើន ហើយតម្លៃដីធ្លីក៏កាន់តែខ្ពស់។ យោងតាមលោកស្រី រចនីហ្វុង តំបន់ខ្លះនៅខណ្ឌទួលគោកដែលកាលពីមុន តម្លៃដីជាមធ្យមមានត្រឹម ១ ៧០០ ដុល្លារក្នុងមួយម៉ែត្រការ៉េ បានឡើងដល់៣ ០០០ ដុល្លារនាពេលនេះ។
លោកស្រីថ្លែងថា៖«កាលពីបី បួនឆ្នាំមុន ខណ្ឌទួលគោកផ្តោតលើតំបន់លំនៅឋានដល់ទៅ ៨០ ភាគរយ ហើយពាណិជ្ជកម្មតែ ២០ ភាគរយទេ»។ លោកស្រីបញ្ជាក់ថា៖«ភាពជាក់ស្តែងនាពេលនេះ ខណ្ឌទួលគោលគឺ៥០ភាគរយជាតំបន់លំនៅឋាន និង ៥០ ភាគរយជាតំបន់ពាណិជ្ជកម្ម»។
បើតាមលោកស្រី រចនីហ្វុង ពាណិជ្ជកម្មនៅខណ្ឌទួលគោកបច្ចុប្បន្នមានពីរផ្នែកសំខាន់ៗរួមមានអគារសម្រាប់ការិយាល័យជួល និងពាណិជ្ជកម្មកម្មវិស័យលក់រាយ។
យោងតាមរបាយការណ៍ភ្នំពេញឆ្នាំ ២០៣០ របស់ក្រុមហ៊ុនវាយតម្លៃអចលនទ្រព្យ V Trust Appraisal ដែលចេញផ្សាយនៅដើមឆ្នាំ ២០១៩ តម្លៃដីតាមវិថីសំខាន់ៗនៅក្នុងខណ្ឌទួលគោកគឺមានចន្លោះពី ២ ០០០ ដុល្លារ ដល់ ៧ ១៤០ ដុល្លារក្នុងមួយម៉ែត្រការ៉េ។ នៅក្នុងខណ្ឌនេះ ដីដែលមានតម្លៃទាបជាងគេគឺតាមបណ្តោយផ្លូវ ៥៩៨ គឺចន្លោះពី ២ ០០០ ដុល្លារ ទៅ ៣ ០០០ ដុល្លារក្នុងមួយម៉ែត្រការ៉េ ខណៈដីតាមបណ្តោមផ្លូវ សម្តេចមុន្នីរ៉េត មានតម្លៃខ្ពស់ជាងគេដែលផ្នែកខ្លះមានដល់ជាង ៧ ០០០ ដុល្លារក្នុងមួយម៉េត្រការ៉េ។
