ខេត្ត​កំ​ពង់​ស្ពឺជាប់ចំណាត់លេខ ២ លើការ​វិនិយោគក្នុងខែ មករា ឆ្នាំ ២០២០​

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) បានផ្តល់​សិទ្ធវិនិយោគ​ដល់​គម្រោង​ស្នើរ​សុំ​បង្កើត​រោង​ចក្រ​ផលិត​កម្ម​ចំ​នួន ៨ កាល​ពី​ខែមករា ឆ្នាំ ២០២០​នេះ ដែល​មាន​ទុន​វិនិយោគ​សរុប​​​ចំ​នួន​ជិត ៣៩ លាន​ដុល្លារ ហើយ​​​អាច​បង្កើត​ការ​ងារថ្មី​​​ចំ​នួន​ ៥ ៧៨៨ នាក់។​

ក្នុង​ចំ​ណោម​ទី​តាំង​ស្នើរ​សុំ​វិនិយោគ​របស់​គម្រោង​ទាំង ៨ ខេត្ត​កំពង់​ស្ពឺ​គឺ​ជា​ទី​តាំង​ទាក់​ទាញ​មួយ​សម្រាប់​​​វិនិយោគិនដោយ​សារ​ក្នុង​ចំ​ណោម​គម្រោង​វិនិយោគ​ទាំង​ ៨ ទី​តាំង​រោង​ចក្រ​ដែល​ទទួល​បាន​សិទ្ធ​ពី​រដ្ឋាភិបាល​ចំ​នួន​ ៣ នឹង​ដាក់​ផលិត​កម្ម​នៅ​​​ខេត្ត​កំ​ពង់​ស្ពឺ ខណៈ​គម្រោងផ្សេង​ទៀត​​ស្ទើរ​ទាំង​អស់​​ដាក់​ទី​តាំង​នៅ​ជាយ​រាជ​ធានី​ភ្នំពេញ ឬ ខេត្ត​កណ្តាល។ យោង​តាម​សេច​ក្តី​ជូន​ដំ​ណឹង​របស់ CDC ដែល​ចេញ​ផ្សាយ​តាម​គេហ​ទំ​ព័រ​ហ្វេសប៊ុក​ផ្លូវ​ការ​របស់​ខ្លួន គម្រោង​វិនិយោគ​ទាំង​ ៨​ ភាគ​ច្រើន​​មាន​ផលិត​កម្ម​ក្នុង​វិ​ស័យ​សម្លៀក​បំ​ពាក់ និង កាត់​ដេរ។ សូម​មើល​​ព័ត៌មាន​ពី​គម្រោង​ទាំង​៨ ដែល​ទទួល​បាន​សិទ្ធ​វិនិយោគ​ពី​ CDC កាល​ពីខែមករា។

1 – ក្រុមហ៊ុន “K.Y ODYSSEY GARMENT CO.,LTD.” វិនិយោគលើគម្រោងបង្កើតរោងចក្រកាត់ដេរសម្លៀកបំពាក់​មានទីតាំងវិនិយោគស្ថិតនៅភូមិត្រាវ ឃុំទឹកល្អក់ ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ១០,៧លានដុល្លារអាមេរិក និងអាចបង្កើតការងារបានចំនួន ១.៧៩៧កន្លែង។

2 – រោងចក្រកាត់ដេរសម្លៀកបំពាក់របស់ក្រុមហ៊ុន “KING LIAN (CAMBODIA) GARMENT FACTORY CO.,LTD.” មានទីតាំង​នៅភូមិបុស្សតា ឃុំកាហែង ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ ៣,១លានដុល្លារអាមេរិក និងអាចបង្កើតការងារបានចំនួន ១.២២៥កន្លែង។

3 – ក្រុមហ៊ុន “KANGTAIXIANG TEXTILE CO., LTD មានទីតាំងវិនិយោគស្ថិតនៅភូមិស្លែង ឃុំមហាសាំង ស្រុកភ្នំស្រួច ខេត្តកំពង់ស្ពឺ មានទុនវិនិយោគប្រមាណ ៥,៥លានដុល្លារអាមេរិក និងអាចបង្កើតការងារបានចំនួន ២៥០កន្លែង។

4 – គម្រោង​​រោងចក្រកាត់ដេរសម្លៀកបំពាក់ និងបោកគក់ SUN AWESOME GARMENT CO., LTD មានទីតាំង​​នៅភូមិកប្បាស ឃុំខ្វិតធំ ស្រុកព្រៃឈរ ខេត្តកំពង់ចាម មានទុនវិនិយោគប្រមាណ៦,៩លានដុល្លារអាមេរិក និងអាចបង្កើតការងារបានចំនួន ៦១០នាក់។

5 – រោងចក្រផលិតកាបូបគ្រប់ប្រភេទ FAMOUS LEATHERWARE (CAMBODIA) CO., LTD. មានទីតាំងវិនិយោគស្ថិតនៅដីទ្បូតិ៍លេខ១៥២៩ (អគារលេខ៧ និងលេខ៨) ផ្លូវជាតិលេខ២ ភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ មានទុនវិនិយោគប្រមាណ៥,៣លានដុល្លារអាមេរិក និងអាចបង្កើតការងារបានចំនួន ៣១៤នាក់។

6 – រោងចក្រត្បាញខ្សែបន្ទះ ខ្សែយឺត និងអំបោះដេរ XIN HAK MUY MAKE CLOTHES ASSIST MATERIAL CO., LTD. មានទីតាំងវិនិយោគស្ថិតនៅផ្លូវលេខ២៧១ ភូមិព្រែកកំពឹស សង្កាត់ព្រែកកំពឹស ខណ្ឌដង្កោ រាជធានីភ្នំពេញ មានទុនវិនិយោគប្រមាណ២,៥លានដុល្លារអាមេរិក និងអាចបង្កើតការងារបានចំនួន ២៣២នាក់។

7 – រោងចក្រផលិតកាបូប និងថង់យួរគ្រប់ប្រភេទ KIMBAO BAG INDUSTRY CO., LTD មានទីតាំងវិនិយោគស្ថិតនៅភូមិត្រពាំងក្រពើ ឃុំក្រាំងម្កាក់ ស្រុកអង្គស្នួល ខេត្តកណ្តាល មានទុនវិនិយោគប្រមាណ២,៥លានដុល្លារអាមេរិក និងអាចបង្កើតការងារបានចំនួន ៣៣៤នាក់។

8 – ​រោងចក្រកាត់ដេរ និងចាក់សម្លៀកបំពាក់របស់ក្រុមហ៊ុន “KNITERACY ASIA COMPANY LIMITED មានទីតាំងវិនិយោគស្ថិតនៅភូមិព្រៃខ្លា ឃុំក្រាំងម្កាក់ ស្រុកអង្គស្នួល ខេត្តកណ្តាល មានទុនវិនិយោគប្រមាណ ២,៤លានដុល្លារអាមេរិក និងអាចបង្កើតការងារបានចំនួន ១.០២៦កន្លែង។