ខុនដូរតម្លៃសមរម្យសម្រាប់ប្រជាជនក្នុងស្រុកបើកលក់នៅថ្ងៃនេះ

Bunthoeun Chhut 31/January/2020 13:57

ចែករំលែក

ភ្នំពេញ៖ ក្រុមហ៊ុន ឌឹ សេវេន រេហ្សីដិនស៍ បានប្រកាសបើកលក់ខុនដូ 7 Residence របស់ខ្លួនដំណាក់កាលទីពីរនៅថ្ងៃសុក្រទី៣១ មករាឆ្នាំ២០២០នេះ បន្ទាប់ពីការដាក់លក់នៅដំណាក់កាលទីមួយបានជោគជ័យ។

គម្រោងខុនដូ 7 Residence បានប្រកាសបើកលក់ដំណាក់កាលទីមួយកាលពីខែមករាឆ្នាំមុន ហើយបានទទួលការបញ្ជាទិញច្រើនពីអតិថិជនក្នុងស្រុក។ នេះបើយោងតាមតំណាងក្រុមហ៊ុន។

លោក អូច វិសាល អគ្គនាយកក្រុមហ៊ុន The Seven Residence Condominium កំពុងបង្ហាញព័ត៌មានពីគម្រោងខុនដូដល់អ្នកចូលរួម

សម្រាប់ដំណាក់កាលទីពីរនេះ ក្រុមហ៊ុននឹងបើកលក់ Condo ថ្មីក្នុងតម្លៃចាប់ពី ៣៥ ០០០ ដុល្លារ ក្នុងមួយយូនីតឡើងទៅ ដែលអតិថិជនអាចបង់រំលស់ប្រចាំខែ ២៩៤ ដុល្លារ។ ក្រុមហ៊ុនធានាជួលត្រលប់វិញរយ:ពេលបីឆ្នាំ បន្ទាប់ពីសង់រួច។ គម្រោងខុនដូ តម្លៃសមរម្យនេះ គ្រោងនឹងបញ្ចប់ការសាងសង់ដើម្បីរួចរាល់សម្រាប់ការរស់នៅនាខែកក្កដា ឆ្នាំ២០២២ ខាងមុខ។ (សូមមើលព័ត៌មានលម្អិតខាងក្រោម)។

របាយការណ៍របស់ V Trust «ភ្នំពេញឆ្នាំ ២០៣០» https://www.vtrustresearch.com/phnom-penh-2030s-the-report/ បានព្យាករណ៍ថា ចំនួនសរុបនៃការផ្គត់ផ្គង់ខុនដូនៅភ្នំពេញនឹងមានដល់ ២៩,៥ ម៉ឺនយូនីតនៅឆ្នាំ ២០៣០ កើនឡើង ៥ ដងពីចំនួន ៦១ ៨០០ យូនីតនៅត្រឹមដំណាច់ឆ្នាំ ២០១៨។

របាយការណ៍ ភ្នំពេញឆ្នាំ ២០៣០ https://www.vtrustresearch.com/phnom-penh-2030s-the-report/

លោក ហ៊ឹម សីហា នាយកផ្នែកស្រាវជ្រាវក្រុមហ៊ុន V Trust Appraisal និងជាអ្នកនិពន្ធរបាយការណ៍ «ភ្នំពេញឆ្នាំ ២០៣០» បានលើកឡើងថា ការពង្រីកទីក្រុង ការកើនឡើងតម្លៃដីធ្លី និងទីតាំងទំនេរនៅជាយទីក្រុងមានកាន់តែតិច នឹងធ្វើឲ្យគម្រោងបុរីថ្មីៗ ដាក់ទីតាំងកាន់តែឆ្ងាយពីភ្នំពេញ។ លោកបន្តថា និន្នាការនេះ នឹងធ្វើឲ្យទីផ្សារគម្រោងខុនដូរតម្លៃសមរម្យកាន់តែល្អឡើង។