ភាសាខ្មែរ 
English 
ភ្នំពេញ៖ អាជ្ញាធរជាតិអប្សរាបានបង្ហាញការតាំងចិត្តថានឹងធ្វើឲ្យបរិវេណប្រាសាទអង្គរមានភាពបៃតង និងមានស្មៅលូតលាស់ខួបប្រាំងខួបវស្សាក្នុងឆ្នាំ២០២០នេះ បន្ទាប់ពីចំនួនភ្ញៀវ និងចំណូលពីការលក់សំបុត្រកាលពីឆ្នាំ ២០១៩ បានធ្លាក់ចុះ។
នៅក្នុងសេចក្តីជូនដំណឹងរបស់ខ្លួនចេញផ្សាយនៅលើគេហទំព័រហ្វេសប៊ុកនៅថ្ងៃអង្គារទី ១៤ មករា ឆ្នាំ ២០២០នេះ អាជ្ញាធរជាតិអប្សរាបានលើកឡើងថា អាជ្ញាធរ នឹងយកចិត្តទុកដាក់ កែលម្អបរិស្ថាននៅជុំវិញបរិវេណប្រាសាទអង្គរវត្តដោយចាប់ផ្តើមពីការដាំស្មៅ ដាំកូនឈើ ដាំផ្កាព្រៃ ជួសជុលផ្លូវនិងប្រព័ន្ធរំដោះទឹក ព្រមទាំងរៀបចំប្រព័ន្ធស្រោចស្រពស្វ័យប្រវត្តិទាំងខួបប្រាំងខួបវស្សា។
សេចក្តីជូនដំណឹងបានបញ្ជាក់ថា៖«អ្វីដែលអាជ្ញាធរជាតិអប្សរាកំពុងតែអនុវត្តន៍ និងផែនការអនាគតគឺសំដៅលើកកម្ពស់សោភ័ណភាព ការរៀបចំសណ្តាប់ធ្នាប់សាធារណៈ និងបង្កើនភាពទាក់ទាញសម្រាប់ភ្ញៀវទេសចរមិនត្រឹមតែប្រាសាទអង្គរវត្តនោះទេ តែរមណីយដ្ឋានអង្គរទាំងមូល»។
រមនីយដ្ឋានអង្គរទាំងមូលបានទទួលភ្ញៀវទេសចរបរទេសតែ ២ លាន ២ សែននាក់ប៉ុណ្ណោះកាលពីឆ្នាំ ២០១៩ ដែលបានធ្លាក់ចុះដល់ទៅជិត ១៥ ភាគរយពីចំនួនភ្ញៀវដែលធ្លាប់ទទួលបានកាលពីឆ្នាំ ២០១៨។ នេះបើយោងតាមរបាយការណ៍ពីខាងគ្រឹះស្ថានអង្គរ ដែលជាស្ថាប័នរដ្ឋគ្រប់គ្រងប្រតិបត្តិការលក់សំបុត្រចូលទស្សនារមនីយដ្ឋានអង្គរ។
ការធ្លាក់ចុះចំនួនភ្ញៀវនេះ ក៏បានធ្វើឲ្យចំណូលធ្លាក់ចុះរហូតដល់ ១៥ ភាគរយពីចំណូលកាលពីឆ្នាំ ២០១៨ មកត្រឹមចំនួន ៩៩ លានដុល្លារប៉ុណ្ណោះនៅឆ្នាំ ២០១៩៕
ខេត្តសៀមរាបដែលជាទីតាំងរបស់រមនីយដ្ឋានអង្គរគឺជាខេត្តសក្តានុពលមួយក្នុងការវិនិយោគលើវិស័យអចលនទ្រព្យដែលកំណើនភ្ញៀវទេសចរបរទេសកន្លងមកបានបង្កើតឲ្យមានតម្រូវការ ការវិនិយោគសណ្ឋាគារ ភោជនីយដ្ឋាន និងពាណិជ្ជកម្មផ្សេងៗដែលលត្រូវការទីតាំងដើម្បីដាក់អាជីវកម្ម។
ការបង្ហាញឆន្ទះរបស់ស្ថាប័នរដ្ឋាភិបាលក្នុងការបង្កើនចំនួនភ្ញៀវទេសចរឡើងវិញអាចជាសញ្ញាល្អដល់សេដ្ឋកិច្ច និងពាណិជ្ជកម្មនៅខេត្តសៀមរាប ដែលអាចមានឥទ្ធិពលល្អដល់វិស័យអចលនទ្រព្យនៅខេត្តសំបូរដោយទេសចរវប្បធម៌របស់កម្ពុជាមួយនេះ៕
