ភាសាខ្មែរ 
English 
ភ្នំពេញ៖ ក្រសួងរៀបចំដែនដី នគរូបនីយកម្ម និងសំណង់ បានចេញលិខិតអនុញ្ញាតសាងសង់ដល់គម្រោងអភិវឌ្ឍលំនៅឋានតម្លៃសមរម្យចំនួន ៥ គម្រោងគិតមកទល់ពេលនេះ ដែលគម្រោងទាំងអស់មានលំនៅឋានជាផ្ទះជាប់ដីចំនួន ៨ ៣៣១ ខ្នង និងលំនៅឋានជាអគារខុនដូ ៧ ២៥៦ ចំណែកឯកជន (Unit)។
យោងតាមរបាយការណ៍ប្រចាំឆ្នាំ ២០១៩ របស់ក្រសួងរៀបចំដែនដី នគរូបនីយកម្ម និងសំណង់ គម្រោងលំនៅឋានតម្លៃសមរម្យទាំង ៥ មានគម្រោងផ្ទះជាប់ដី ៣ គម្រោង និងជាប្រភេទគម្រោងលំនៅឋានបែបខុនដូ ២ គម្រោង។ សូមអានលម្អិតគម្រោងនីមួយៗដូចខាងក្រោម។
១ – គម្រោងអភិវឌ្ឍលំនៅដ្ឋានតម្លៃសមរម្យ «សុខារេស៊ីដិន»។ គម្រោងនេះទើបចាប់ផ្តើមសាងសង់នាថ្ងៃទី ១៧ ខែធ្នូ ឆ្នាំ ២០១៩ ដោយមានទីតាំងនៅភូមីផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។ ជាប្រភេទគម្រោងខុនដូមាន ៤ ២៩៦ ចំណែកឯកជន (Unit)។
២ – គម្រោងអភិវឌ្ឍលំនៅដ្ឋានតម្លៃសមរម្យ «ហ្រ្កេនផាក» ដំណាក់កាលទី ១ មានទីតាំងស្ថិតនៅភូមិទួលកី សង្កាត់ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញ (សម្រេចបាន ៦៧ ភាគរយ)។
៣ – គម្រោងអភិវឌ្ឍលំនៅឋានតម្លៃសមរម្យ «លំនៅឋានអារ៉ាខាវ៉ា» ជាគម្រោងលំនៅឋានប្រភេទអគារខុនដូ ដែលមានចំនួន ២ ៩៦០ ចំណែកឯកជន (Unit) មានទីតាំងស្ថិតនៅភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ (សម្រេចបាន ៥១ ភាគរយ)។
៤ – គម្រោងអភិវឌ្ឍលំនៅឋានតម្លៃសមរម្យ «បុរីសែនមនោរម្យព្រែកតាទែន» អភិវឌ្ឍដោយក្រុមហ៊ុន B&BM Development Co.,Ltd. មានទីតាំងស្ថិតនៅភូមិស្លែងដីដុះ ឃុំព្រែកតាទែន ស្រុកពញាឭ ខេត្តកណ្តាល សម្រេចបាន ៥០ ភាគរយ។
៥ – គម្រោងអភិវឌ្ឍលំនៅឋានតម្លៃសមរម្យ «លំនៅឋានទីក្រុងរណបសិរីមង្គល» របស់ក្រុមហ៊ុន Worldbridge Homes Co.,Ltd. មានទីតាំងនៅភូមិកោះគរ ឃុំរកាខ្ពស់ ស្រុកស្អាង ខេត្តកណ្តាល (សម្រេចបាន ៩០ ភាគរយ)។
