ទីតាំងសក្តានុពល ៥ ដែលអ្នកវិនិយោគដីធ្លីគួរពិចារណាដើម្បីទិញ-លក់បានចំណេញក្នុងឆ្នាំ ២០២០

ភ្នំពេញ៖ ការទិញ-លក់អចលនទ្រព្យដើម្បីយកចំណេញកំពុងមានការពេញនិយមខ្លាំងនៅកម្ពុជា ហើយការវិនិយោគប្រភេទនេះអាចបង្កើតប្រាក់ចំណូលអកម្មដ៏ល្អមួយសម្រាប់វិនិយោគិន។ ដើម្បីឲ្យការវិនិយោគដីធ្លីទទួលបានផលចំណេញខ្ពស់ ការជ្រើសរើសទីតាំងត្រឹមត្រូវនិងមានសក្តានុពល គឺជាកត្តាសំខាន់បំផុត។

នៅក្នុងសន្និសិទសារព័ត៌មានស្តីពីគម្រោងនៃការបើកការិយាល័យថ្មីទាំង ៣៨ របស់ក្រុមហ៊ុន Century 21 Zillion Holding កាលពីពេលថ្មីៗកន្លងទៅនេះ លោក ច្រឹក សុខនីម នាយកប្រតិបត្តិក្រុមហ៊ុន Century 21 Mekong និងជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានបង្ហាញទីតាំងសក្តានុពល ៥ កន្លែងដែលអ្នកវិនិយោគគួរពិចារណាក្នុងការទិញដីដើម្បីទទួលបានឱកាសចំណេញខ្ពស់។ ខាងក្រោមនេះគឺជាទីតាំងទាំង ៥

១ – ខេត្តកណ្តាល៖ គឺជាខេត្តដែលមានសក្តានុពល និងមានឱកាសច្រើនក្នុងការទទួលបានផលចំណេញ ដោយប្រើត្រឹមរយៈពេលខ្លី។ តំបន់ជាយៗរាជធានីភ្នំពេញ សុទ្ធសឹងជាទីតាំងសក្តានុពល ហើយផុតពីភ្នំពេញ តំបន់ដែលមានសក្តានុពលខ្ពស់ គឺតំបន់ចន្លោះផ្លូវជាតិលេខ ៦ ផ្លូវជាតិលេខ ៥ និងផ្លូវជាតិលេខ ៦១។ យោងតាមលោក សុខនីម ម្ចាស់បុរីធំៗបានទិញដីធំៗចន្លោះផ្លូវជាតិទាំងបីខាងលើ ហើយបុរីទាំងនោះនឹងអភិវឌ្ឍរួមគ្នា ដែលនឹងធ្វើឲ្យតំបន់នេះក្លាយជាតំបន់មានអគារខ្ពស់ៗ និងអគារពាណិជ្ជកម្មនាពេលខាងមុខ។

អ្នកដំណើរកំពុងធ្វើចរាចរណ៍ជិតស្ពានព្រែកតាមាក់កាលពីថ្ងៃពុធទី ៨ មករា ២០២០

២ – ខេត្តព្រះសីហនុ៖ ជាខេត្តសក្តានុពលសេដ្ឋកិច្ច និងជាទីក្រុងកំពង់ផែអន្តរជាតិដ៏ធំរបស់កម្ពុជា។ ហេដ្ឋារចនាសម្ព័ន្ធដូចជាផ្លូវ និង អាកាសយាន្ដដ្ឋានជាដើមបាននឹងកំពុងធ្វើឲ្យទំនើបឡើង ហើយខេត្តព្រះសីហនុ នឹងភ្ជាប់មកភ្នំពេញតាមផ្លូវល្បឿនលឿន។ ខេត្តព្រះសីហនុមានសក្តានុពលខ្ពស់ តែតំបន់ខ្លះអាចត្រូវការពេលវេលាយូរបន្តិច។

អគារខ្ពស់ៗកំពុងរីកដុះដាលនៅកណ្តាលក្រុងព្រះសីហនុ ហើយចរន្តនេះបានធ្វើឲ្យតម្លៃដីធ្លីនៅជាយក្រុងឡើងថ្លៃយ៉ាងឆាប់រហ័ស

៣ - ខេត្តកំពត៖ ជាគោលដៅទេសចរ និងវិនិយោគថ្មី បន្ទាប់ពីខេត្តព្រះសីហនុ។ កំពតកំពុងទាក់ទាញវិនិយោគិន ជាក់ស្តែងគម្រោងក្រុមហ៊ុន Forest Harmony Co, Ltd ដែលបោះទុនវិនិយោគ ១៨លានដុល្លារអាមេរិក ដើម្បីសាងសង់វីឡាលំហែរកាយនៅលើផ្ទៃដីជាង១៣ហិកតា បានដាក់ទីតាំងនៅជិតក្រុងកំពត។ ខេត្តកំពត មានអំណោយផលខ្ពស់សម្រាប់ការវិនិយោគដីធ្លី ទាំងកត្តាគោលនយោបាយភូមិសាស្រ្តរបស់រដ្ឋាភិបាល និង កត្តាធម្មជាតិ។

ទិដ្ឋភាពក្នុងបរិវេណគម្រោងរបស់ក្រុមហ៊ុន Forest Harmony Co, Ltd ដែលសាងសង់វីឡាលំហែរកាយនៅលើផ្ទៃដីជាង១៣ហិកតា

៤ – កំពង់ស្ពឺ៖ ជាខេត្តដែលកន្លងមកមនុស្សជាច្រើនទៅហួសមកហួស។ ដីតំបន់មួយចំនួននៅធូថ្លៃ។ ដីចូលក្នុងបន្តិចពីក្រុងច្បារមន កាលពីឆ្នាំ ២០១៨ មួយហិកតាមានតម្លៃចន្លោះពី ៦ ០០០ដុល្លារ ទៅ ៧ ០០០ ដុល្លារ តែឥលូវឡើងដល់ ៣០ ០០០ ដុល្លារ។ យ៉ាងណាក៏ដោយ លោក សុខនីម បញ្ជាក់ថា ដីធ្លីនៅខេត្តកំពង់ស្ពឺនៅតែមានសក្តានុពល និងមានឱកាសបន្តឡើងថ្លៃទៀត។

ទិដ្ឋភាពនៅភូមិមួយ នៃឃុំអមលាំង ស្រុកថ្ពង ខេត្ដកំពង់ស្ពឺ

៥ – សៀមរាប៖ នៅតែជាខេត្តទេសចរដ៏មានសក្តានុពល។ សៀមរាបមានតំបន់អភិរក្សច្រើន តែក៏មានតំបន់ខ្លះស្ថិតក្នុងតំបន់ពាណិជ្ជកម្ម ដែលអាចវិនិយោគក្នុងវិស័យបដិសណ្ឋាកិច្ច ដូចជាសណ្ឋាគារ ឬ ភោជនីយដ្ឋាន។ ដីធ្លី នៅជាយៗខេត្តសៀមរាប នៅមានសក្តានុពលល្អក្នុងការទិញលក់ដើម្បីយកចំណេញ។

**** ទន្ទឹមនឹងការបញ្ជាក់ពីទីតាំងសក្តានុពលខាងលើ អ្នកជំនាញផ្នែកអចលនទ្រព្យក៏ក្រើនរំឭកដល់សាធារណៈជនក្នុងការទទួលបានប្រឹក្សាវិនិយោគពីភ្នាក់ងារមានវិជ្ជាជីវៈ និងក្រមសិលធម៌ច្បាស់លាស់ដើម្បីទទួលបានឱកាសចំណេញខ្ពស់។