ភាសាខ្មែរ 
English 
ព្រះសីហនុ៖ ការបញ្ចប់សពុលភាពអជ្ញាបណ្ណល្បែងអនឡាញនៅត្រឹមដំណាច់ឆ្នាំ ២០១៩ កន្លងទៅបានធ្វើឲ្យមានចលនាចាកចេញយ៉ាងគម្ហក់នៃជនជាតិចិនពីកម្ពុជា ជាពិសេសខេត្តព្រះសីហនុ។ របាយការណ៍របស់ អគ្គនាយកដ្ឋានអន្តោប្រវេសន៍នៃក្រសួងមហាផ្ទៃបានឲ្យដឹងថា ជនជាតិចិនជិត ៥០ ម៉ឺននាក់បានចាកចេញពីកម្ពុជា គិតមកទល់ពេលនេះដែលភាគច្រើនជាអ្នកស្នាក់នៅខេត្តព្រះសីហនុ។
តើការចាកចេញយ៉ាងគម្ហក់នាពេលនេះបានធ្វើឲ្យទីផ្សារអចលនទ្រព្យនៅខេត្តព្រះសីហនុរងផលប៉ះពាល់យ៉ាងណាខ្លះ? លោក អ៊ឹម សេងហួ ប្រធានសាខាក្រុមហ៊ុនអចលនទ្រព្យ Century 21 Lay Min Realty ខេត្តព្រះសីហនុបានរៀបរាប់ពីចំណុចសំខាន់ៗដូចខាងក្រោម។
១ – ការជួលអគារសម្រាប់ពាណិជ្ជកម្ម និងស្នាក់នៅ៖ ទីផ្សារជួលអគាររងផលប៉ះពាល់ខ្លាំងជាងគេ ដោយសារអគារជាច្រើនត្រូវបានជួលដើម្បីធ្វើជាទីតាំងសម្រាប់អាជីវកម្មល្បែងអនឡាញ។ តម្លៃជួលអគារបានធ្លាក់ចុះជាង ៥០ ភាគរយពីតម្លៃមុនខែសីហា។ អគារខ្លះដែលធ្លាប់ជួលក្នុងតម្លៃ ២ ម៉ឺនដុល្លារក្នុងមួយខែកាលពីមុន ឥលូវធ្លាក់មកត្រឹម ៨ ០០០ ដុល្លារក្នុងមួយខែ។
២ – ដីធ្លី៖ តម្លៃដីមានការធ្លាក់ចុះប្រហែល ២០ ភាគរយពីកាលពីមុខខែសីហា (មុនពេលរដ្ឋាភិបាលប្រកាសឈប់បន្តអជ្ញាបណ្ណល្បែងតាមអនឡាញ)។ យោងតាមព័ត៌មានពីក្រុមហ៊ុនអចលនទ្រព្យ Century 21 Lay Min Realty ការទិញលក់មិនមានភាពពុះកញ្ជ្រោលខ្លាំងដូចមុននោះទេ តែតម្លៃដីធ្លីនៅខេត្តព្រះសីហនុមិនមានការធ្លាក់ចុះខ្លាំងទេ។ លោក សេងហួ បានលើកឡើងជាឧទាហរណ៍ថា តម្លៃដីដែលធ្លាប់ដាក់ចេញ ២ ៥០០ ដុល្លារក្នុងម៉ែត្រការ៉េ បានធ្លាក់មកត្រឹម ២ ២០០ ដុល្លារក្នុងមួយម៉ែត្រការ៉េ។ ម្ចាស់ដីធ្លីនៅខេត្តព្រះសីហនុភាគច្រើនគឺជាអ្នកមានជីវភាពធូរធារ ដូច្នេះប្រសិនបើអ្នកទិញឲ្យតម្លៃទាបពេក ម្ចាស់ដីមិនលក់នោះទេ។
៣ – សំណង់អគារ៖ គម្រោងសំណង់ទាំងតូច ធំនៅខេត្តព្រះសីហនុ មិនមានរងផលប៉ះពាល់ទេ។ ជាក់ស្តែង ដងសន្ទួចសម្រាប់វិស័យសំណង់បន្តច្រូងច្រាងស្ទើរគ្រប់ទីកន្លែង ហើយសកម្មភាពសាងសង់ជាក់ស្តែងនៅបន្តដំណើរការយ៉ាងល្អ និងកាន់តែសកម្ម។ អគារខ្ពស់ៗបន្តរីកឡើងជាបន្តបន្ទាប់ ហើយមិនមានឃើញ គម្រោងសាងសង់ណាមួយនៅខេត្តព្រះសីហនុត្រូវបានផ្អាកឡើយ។
៤ – អ្នកវិនិយោគចិនពិតប្រាកដបន្តនៅ៖ ទោះបីជាជនជាតិចិនអ្នកលេងល្បែងបានចាកចេញ តែជនជាតិចិនដែលជាអ្នកវិនិយោគពិតប្រាកដដូចជា អ្នកវិនិយោគលើខុនដូ អាផាតមិន និង រីសតផ្សេងៗបន្តស្នាក់នៅ និងធ្វើអាជីវកម្មនៅខេត្តព្រះសីហនុជាបន្ត។
៥ – ទេសចរពីខាងលោកខាងលិចចាប់ផ្តើមវត្តមានឡើងវិញ៖ យោងតាមលោក សេង ហួ នៅអំឡុងខែធ្នូឆ្នាំ ២០១៩ កន្លងទៅ គេសង្កេតឃើញមានវត្តមានទេសចរជនជាតិអ៉ឺរ៉ុបច្រើនជាងមុនចូលមកទស្សនាកម្សាន្តនៅខេត្តព្រះសីហនុ បន្ទាប់ពីស្ងប់ស្ងាត់មួយរយៈពេលធំ។ នេះជាសញ្ញាល្អ សម្រាប់កំណើនភ្ញៀវទេសចរចំរុះជាតិសាសន៍នៅខេត្តជាប់សមុទ្ររបស់កម្ពុជា។
៦ – ហេដ្ឋារចនាសម្ព័ន្ធខេត្តព្រះសីហនុនឹងកាន់តែទំនើប៖ ហេដ្ឋារចនាសម្ព័ន្ធនៅក្នុងខេត្តព្រះសីហនុដែលកំពុងរងការខូចខាត នឹងត្រូវបានស្ថាបនាឡើងវិញឲ្យទំនើប បន្ទាប់ពីរដ្ឋាភិបាលកម្ពុជាកាលពីខែវិច្ឆិកាឆ្នាំ ២០១៩ បានសម្ពោធបើកការដ្ឋានស្ថាបនាឡើងវិញផ្លូវ៣៤ ខ្សែដែលមានប្រវែងសរុប ៨៤,៥ គីឡូម៉ែត្រ។ គម្រោងទាំងមូលគ្រោងចំណាយប្រាក់សរុប ២៩៤ លានដុល្លារ។ នៅពេលហេដ្ឋារចនាសម្ព័ន្ធទាំងនេះសាងសង់រួចរាល់ខេត្តព្រះសីហនុនឹងក្លាយជាទីតាំងសម្រាប់ពាណិជ្ជម្មនិងសេដ្ឋកិច្ចអន្តរជាតិ។
