កម្ពុជាជាប់ជាប្រទេសមានកំណើនសេដ្ឋកិច្ចខ្ពស់ជាងគេទី ៥ នៅតំបន់អាស៊ីប្រចាំឆ្នាំ ២០២០

ហ៊ គីមសាយ 31/December/2019 15:33
ទស្សនា
ចែករំលែក

ភ្នំពេញ​៖ សារព័ត៌​មាន​សេដ្ឋ​កិច្ច​ដ៏​ល្បី​ល្បាញ​របស់សហ​រដ្ឋ​​អាមេរិក Forbes បាន​ចេញ​ផ្សាយ​អត្ថ​បទ​​មួយ​កាល​ពី​ថ្ងៃ​ ៣០ ធ្នូ​ ២០១៩ ដោយ​បាន​បញ្ជាក់​ថា​កម្ពុជា​ គឺ​ជា​ប្រ​ទេស​ដែល​មាន​កំ​ណើន​សេដ្ឋ​កិច្ចខ្ពស់​​ជាង​គេ​ទី ៥ នៅ​ក្នុង​តំ​បន់​អា​ស៊ីប្រ​ចាំ​​​ឆ្នាំ ២០២០។

Forbes បានដក​ស្រង់​​​​​ទិន្ន​ន័យសេដ្ឋ​កិច្ច​របស់​ធនាគារ​អភិវឌ្ឍន៍​អា​ស៊ី (ADB) ដោយ​បញ្ជាក់​ថា កម្ពុជា​នឹង​មាន​កំ​ណើន​សេដ្ឋ​កិច្ច ៦,៨ ភាគរយ​នៅឆ្នាំ ២០២០។ កំ​ណើន​សេដ្ឋ​កិច្ច​បាន​រួម​ចំ​ណែក​ដោយ​ កំ​ណើន​ការវិនិយោគរបស់ចិននៅកម្ពុជាដែល​កំ​ពុង​​បន្ថែមការ​វិនិយោគ​ពី​ឧស្សាហ​កម្ម​កាត់​ដេរដែល​មាន​ស្រាប់​ មក​កា​រ​វិនិយោគ​លើ​វិ​ស័យ​អចលនទ្រព្យ រមណីយដ្ឋាន ឆ្នេរសមុទ្រ និងហេដ្ឋារចនាសម្ព័ន្ធដូចជាផ្លូវថ្នល់ និងអាកាសយានដ្ឋាន។

សំ​ណង់​អគារខ្ពស់ៗសម្រាប់​​ពាណិជ្ជកម្ម និង លំ​នៅ​ឋាន​ កំ​ពុង​រីក​ដុះ​ដាល​នៅ​ទី​ក្រុង​ភ្នំពេញ

ប៉ុន្តែយ៉ាង​ណា​ក៏​ដោយ កំណើនសេដ្ឋ​កិច្ច​ ៦,៨ ភាគរយនេះ គឺ​បាន​បង្ហាញ​ពី​អត្រា​ទាប​ជាង​មុន​នៃកំ​ណើន​សេដ្ឋ​កិច្ច​កម្ពុជា ដែលធ្លាប់​មាន ៧ ភាគរយ ឬ​លើស​ពី​នេះ រាប់​ចាប់​តាំង​ពី​ឆ្នាំ២០១១ មក។

​​កំ​ណើន​សេដ្ឋ​កិច្ច​​​ជា​ទូ​ទៅតែង​មានអត្រា​​ខ្ពស់​នៅ​ប្រ​ទេស​ដែល​កំ​ពុង​អភិវឌ្ឍន៍​​​ជាង​ប្រ​ទេស​ដែល​អភិវឌ្ឍន៍ស្រាប់។

ខាង​ក្រោម​នេះ​គឺជា​បណ្តា​ប្រ​ទេស​ដែល​មាន​កំ​ណើន​សេដ្ឋ​កិច្ច​ខ្ពស់​ជាង​គេ​ទាំង​ ៦ នៅ​អាស៊ី​ដែល​ត្រូវ​បាន​ Forbes ដក​ស្រង់​យក​មក​បង្ហាញ​ក្នុង​អត្ថ​បទ។

១ – ប្រ​ទេស បង់​ក្លាដេស៖ អត្រា​កំ​ណើន​សេដ្ឋ​កិច្ច ៨ ភាគរយ

២ – ប្រទេស ឥណ្ឌា៖ អត្រា​កំ​ណើន​សេដ្ឋ​កិច្ច ៧,២ ភាគរយ​

៣ – ប្រទេស តាជីគីស្ថាន៖ អត្រា​កំ​ណើន​សេដ្ឋកិច្ច ៧ ភាគរយ​

៤ – ប្រទេស មី​យ៉ាន់​ម៉ា​៖ អត្រា​កំ​ណើន​សេដ្ឋ​កិច្ច ៦,៨ ភាគរយ​

៥ – ប្រទេស​កម្ពុជា៖ អត្រា​កំ​ណើន​សេដ្ឋ​កិច្ច ៦,៨ ភាគរយ​

៦ – ប្រទេស​វៀត​ណាម៖ អត្រា​កំ​ណើន​សេដ្ឋកិច្ច​ ៦,៧​ ភាគរយ​

ប្រ​ទេសកំ​ពុង​អភិវឌ្ឍន៍​នៅ​​អាស៊ី​ផ្សេងទៀតដែល ADB ព្យាករណ៍ថានឹងមាន​កំ​ណើន​សេដ្ឋ​កិច្ច​លើស​ពី​ ៦ ភាគរយ​​រួមមានដូច​ជា​ នេប៉ាល់ និង​ម៉ាល់ឌីវ ដែល​មាន​អត្រា​កំណើន​ ៦,៣ ភាគរយ​ ឡាវ និងហ្វីលីពីន ៦,២ ភាគរយ​ ខណៈ​​ម៉ុងហ្គោលី ៦,១ ភាគរយ​។

អត្តបទប្រភេទ៖

👉👉👉 ចុច Subscribe ឆានែល Telegram របស់ Z1News ដើម្បីទទួលបានព័ត៌មានថ្មីៗទាន់ចិត្ត

ពាក្យទាក់ទង