ភាសាខ្មែរ 
English 
ភ្នំពេញ៖ ទំហំផ្សារទំនើបដែលដំណើរការនៅទីក្រុងភ្នំពេញនឹងកើនដល់ចំនួនសរុបជិត ១ លានម៉ែត្រការ៉េនៅឆ្នាំ ២០៣០ ខាងមុខ ដែលជាកំណើនជិត៤ ដងពីទំហំប្រតិបត្តិការដែលមានស្រាប់នាពេលបច្ចុប្បន្ន។ នេះបើយោងតាមការព្យាករណ៍រប ស់ក្រុមហ៊ុនវាយតម្លៃអចលនទ្រព្យ V Trust Appraisal។
កាលពីល្ងាចថ្ងៃពុធសប្តាហ៍នេះ ក្រុមប្រឹក្សាអភិវឌ្ឍន៍កម្ពុជា (CDC) ទើបសម្រេចផ្តល់សិទ្ធជាស្ថាពរ ដល់គម្រោងស្នើសុំវិនិយោគរបស់ផ្សារទំនើប អ៊ីអន ៣ ដែលមានទីតាំងនៅតាមបណ្តោយមហាវិថីសម្តេចហ៊ុន សែន ដែលមានទុនវិនិយោគ ២៨៩,៦ លានដុល្លារ។ នៅថ្ងៃសុក្រនេះ CDC បានសម្រេចផ្តល់សិទ្ធជាស្ថាពរដល់គម្រោងស្នើសុំវិនិយោគរបស់ផ្សារទំនើប ជីប ម៉ុង សែន សុខ ដែលមានទុនវិនិយោគ ៤១,៥ លានដុល្លារ។
យោងតាមរបាយការណ៍ «ភ្នំពេញឆ្នាំ ២០៣០» របស់ក្រុមហ៊ុន V Trust Appraisal គិតត្រឹមដំណាច់ឆ្នាំ ២០១៨ ទំហំផ្សារទំនើបនៅភ្នំពេញបូកបញ្ចូលគ្នាមានទំហំសរុបជិត ២៥ ម៉ឺនម៉ែត្រការ៉េ។ ការសិក្សាដដែលបានព្យាករថា ការផ្គត់ផ្គង់ផ្សារទំនើបនឹងមានកំណើន៤ នៅដប់ឆ្នាំទៀត ដែលធ្វើឲ្យទំហំផ្សារទំនើបនៅភ្នំពេញកើនដល់ ៩៤ ម៉ឺនម៉ែត្រការ៉េនៅឆ្នាំ ២០៣០ ខាងមុខ។
លោក ហ៊ឹម សីហា នាយកផ្នែកស្រាវជ្រាវនៃក្រុមហ៊ុន V Trust Appraisal និងជាអ្នកនិពន្ធរបាយការណ៍ «ភ្នំពេញឆ្នាំ ២០៣០» បានបញ្ជាក់ថា៖«ទំហំផ្សារទំនើបតែងកើនឡើង៤ដងជារៀងរាល់១០ ឆ្នាំម្តង។ បើក្រលេកមើលការកើនឡើងនៃប្រាក់ចំណូលរបស់ប្រជាជនក្នុងស្រុក និងនិន្នាការនៃការនិយមផ្សារទំនើប សេណេរីយ៉ូនៃកំណើនត្រឹម ៤ ដងនៅ១០ឆ្នាំបន្ទាប់ទៀតគឺពិតជាមានភាគរយច្រើនដែលអាចកើតមាន»។
ជាទូទៅការវិវត្តន៍នៃទំហំប្រតិបត្តិការនៃវិស័យផ្សារទំនើបទាំងមូល តែងវាស់វែងដោយការបូកបញ្ចូលផ្ទៃក្រលារបស់គម្រោងផ្សារទំនើបនីមួយៗបូកបញ្ចូលគ្នា ឬ គិតពីផ្ទៃក្រលាសម្រាប់ដាក់ជួលទៅឲ្យអាជីវករផ្សេងៗបន្ត។
របាយការណ៍ V Trust Appraisal បង្ហាញថាសម្រាប់ផ្ទៃក្រលាផ្សារទំនើបដែលសាងសង់រួច ហើយកំពុងដាក់ឲ្យប្រតិបត្តិការ តម្លៃជួលជាមធ្យមមានប្រមាណ ៣៨ ដុល្លារក្នុងមួយម៉ែត្រការ៉េនៅក្នុងទីក្រុងភ្នំពេញទាំងមូល។ តម្លៃជួលផ្ទៃក្រលាផ្សារទំនើបដែលទីតាំងនៅកណ្តាលទីប្រជុំជនមានរង្វង់ ៤២ ដុល្លារក្នុងមួយម៉ែត្រការ៉េ និង នៅតំបន់ជាយទីប្រជុំជនមាន ៣១ ដុល្លារក្នុងមួយម៉ែត្រការ៉េ។
វត្តមានផ្សារទំនើបថ្មីតែងបង្កើតឲ្យមានមុខរបរថ្មីៗជាច្រើនរួមមាន មុខរបរក្នុងវិស័យអាហារនិងភេសជ្ជៈ វិស័យលក់រាយ និងរបរជាច្រើនផ្សេងទៀត។ មិនត្រឹមតែប៉ុណ្ណោះ ផ្សារទំនើបក៏បានបង្កើនតម្លៃដី និងអចលនទ្រព្យនៅតំបន់ជុំវិញ។
